काठमाडौं । देशका केही भूभागमा आज हिमपातको सम्भावना छ । कोसी र गण्डकी प्रदेशका उच्च हिमाली भूभागका एकदुई स्थानमा हल्का हिमपातको सम्भावना रहेको हो । 

कोसी र मधेस प्रदेशलगायत देशका पहाडी भूभागमा आंशिक बदली रहनेछ । बाँकी भू–भागमा मौसम आंशिक बदलीदेखि सामान्यतया सफा रहनेछ । 

काठमाडौंमा दिउँसो अधिकतम तापक्रम २६ देखि २८ डिग्री सेल्सियसको बीचमा रहने जल तथा मौसम विज्ञान विभागले जनाएको छ । 

राति कोसी, मधेस, वाग्मती, सुदूरपश्चिम प्रदेशलगायत देशका पहाडी भूभागमा आंशिक बदली रहनेछ । बाँकी भूभागमा आंशिक बदलीदेखि सामान्यतया सफा रहनेछ । 

गण्डकी प्रदेशका उच्च हिमाली भूभागका केही स्थानमा हल्का हिमपातको सम्भावना रहेको विभागले जनाएको छ ।

अझै केही दिन वर्षाको सम्भावना छैन । “तत्काल वर्षाको सम्भावना छैन । कम्तीमा तीन दिन अझै वर्षा हुने देखिएको छैन,” मौसमविद् मीनकुमार आर्यालले बाह्रखरीसँग भने, “भइरहेको प्रणाली स्ट्रङ नहुने र नयाँ प्रणाली पनि विकास नहुँदा तत्काल वर्षाको सम्भावना छैन ।” 

वर्षा नहुँदा वायु प्रदूषण पनि यथावत रहनेछ । यद्यपि, हावाको वेग केही बढ्ने भएकाले आज र भोलि वायु प्रदूषण केही कम हुने मौसमविद् अर्याल बताउँछन् । 

“मंगलबार र बुधबारको भन्दा आज र भोलि वायु प्रदूषण केही कम हुने सम्भावना छ । किन भने आज र भोलि हावाको वेग केही बढ्नेछ,” उनले भने, “तर, प्रदूषण पूरै कम गर्नेगरी भने होइन ।” 

सुदूरपश्चिम प्रदेशबाहेक बाँकी प्रदेशमा आज हावाको वेग बढ्ने उनले बताए । 

बादल लागेर वर्षा हुन खोजे पनि पानी पर्न नसकेको उनले बताए । हाल देशमा पश्चिमी र स्थानीय वायुको आंशिक प्रभाव रहेको छ । यी दुवै प्रणाली ‘स्ट्रङ’ नहुँदा बादल लागेर पनि पानी पर्न नसकेको हो ।