काठमाडौं । म्यानचेस्टर सिटीले फरवार्ड एर्लिङ हाल्यान्डको खुट्टामा चोट लागेको पुष्टि गरेको छ । हाल्यान्ड एफए कप क्वार्टरफाइनलमा बर्नमाउथविरुद्धको खेलमा घाइते भएका हुन् ।

क्लबले हाल्यान्डको देब्रे खुट्टामा लागेको चोटको पुष्टि गरे पनि बाँकी जानकारी थप परीक्षणपछि सार्वजनिक गरिने जनाएको छ ।

उक्त खेलमा हाल्यान्ड ६१औँ मिनेटमा मैदान छोडेका थिए । चोट व्यहोरेसँगै हाल्यान्डले सेमिफाइनल गुमाउन सक्ने सम्भावना उच्च रहेको अन्तर्राष्ट्रिय सञ्चारमाध्यमले उल्लेख गरेका छन् ।

जारी सिजन हाल्यान्डले प्रिमियर लिगमा २८ खेल खेल्दा २१ गोल गरेका छन् । पछिल्लो चार सिजनको विजेता सिटी यसपटक प्रिमियर लिगमा संघर्षरत छ । सिटीले बुधबार घरेलु मैदानमा लेस्टर सिटीलाई आतिथ्यता प्रदान गर्ने तालिका छ ।