म्यानमा । म्यान्मा र थाइल्यान्डमा शुक्रबार गएको शक्तिशाली भूकम्पमा परी लगभग १५० जनाको मृत्यु भएको छ भने सयौँ घाइते भएका छन् । दर्जनौँ मानिस भत्किएका भवनहरूमा फसेका छन् । मृत्यु हुनेको संख्या बढ्ने अनुमान गरिएको छ ।

शुक्रबार दिउँसो सागिङ सहरको उत्तरपश्चिममा ७.७ म्याग्निच्युडको भूकम्प गएको अमेरिकी भूगर्भीय सर्वेक्षणले जनाएको छ । केही मिनेटपछि सोही क्षेत्रमा ६.४ म्याग्निच्युडको भूकम्प गएको थियो ।

भूकम्पले म्यान्माका ठूला भागहरूमा भवन ध्वस्त बनाएको छ भने पुलहरू भत्किएका छन् । सडकहरू भत्किनुका साथै सयौँ किलोमिटर टाढा बैंककमा सोत निर्माणाधीन ३० तले गगनचुम्बी भवन पनि भत्किएको छ । 

यद्यपि प्रकोपको पूर्ण क्षतिबारे अझै खुल्न सकेको छैन । गृहयुद्धबाट प्रभावित म्यान्माका नेताले अन्तर्राष्ट्रिय सहायताको लागि अपिल गरेका छन् । 

जन्टाका प्रमुख मिन आङ ह्लिङले १४४ जनाको ज्यान गएको र ७३२ जना घाइते भएको बताए । साथै, उनले मृत्यु हुनेको संख्या बढ्न सक्ने बताए । थाइल्यान्डमा अहिलेसम्म तीनजनाको मृत्यु भएको पुष्टि भएको छ ।

“केही ठाउँमा, केही भवनहरू भत्किए,” राजधानी नेपिडावको एक अस्पतालको भ्रमणपछि टेलिभिजनमा सम्बोधन गर्दै उनले भने ।

“म कुनै पनि देश, कुनै पनि संस्था वा म्यान्माका जो कोहीलाई पनि सहयोग गर्न आउन आमन्त्रित गर्न चाहन्छु । धन्यवाद ।”

उनले विपत्तिपछि व्यापक राहत प्रयास गर्न आग्रह गरेका छन् । विदेशी सहायताका लागि सबै बाटो खोलिएको उनले बताए । रासस/एएफपी