काठमाडौं । जिल्ला परिसर काठमाडौंले दुई अर्ब ९६ लाखभन्दा बढीको अनलाइन जुवा खेल्ने/खेलाउने ११ भारतीय नागरिकलाई पक्राउ गरेको छ । मंगलबार साँझ सवा ५ बजे बूढानीलकण्ठको देउला टोलस्थित एक घर भाडामा लिई अनलाइन जुवा (सट्टाबाजी) खेलाइरहेको अवस्थामा उनीहरू पक्राउ परेका हुन् । 

प्रहरी टोलीले भारतीय नागरिकहरू सनी मिणा, मोहित बर्मा, पियुस भारद्वाज, हरकेश डडैया, निशान्त भारद्वाज, आकाश बर्मा, अंकितकुमार सैनी, सन्जु शाकला, रामसिंह जाठ, लोकेश कुमार र विकाश कुमारलाई पक्राउ गरेको छ । 

निजहरुले दुई अर्ब रुपैयाँभन्दा बढी रकमको कारोबार हुनेगरी अनलाइन जुवा (सट्टेबाजी) खेल्ने–खेलाउने कार्य गरेको र ९६ लाख ३३ हजारभन्दा बढी रकमबराबरको अभौतिक मुद्रा (क्रिप्टो करेन्सी)को कारोबार समेत गरेको देखिएको प्रहरीले जनाएको छ । 

उनीहरूको साथबाट प्रहरीले ३४ थान मोबाइल, पाँच थान ल्यापटप, हिसाबकिताबको अभिलेख राखिएको नोट बुक चार थान, भारतीय बैंक खाताको चेक बुक १४ थान भारतीय एटीएम २७ थान र भारतीय सिमकार्ड ४० थान बरामद गरेको छ । 

पक्राउ परेकाहरूलाई काठमाडौ जिल्ला अदालतबाट सात दिनको म्याद थप अनुमति लिएर थप अनुसन्धान भइरहेको परिसरका सूचना अधिकारी प्रहरी उपरीक्षक अपिलराज बोहराले जानकारी दिए ।