बेइजिङ । भिडियो सेयरिङ प्लेटफर्म टिकटकले सेक्युरिटी चेकअप नामक नयाँ सेक्युरिटी टुल लन्च गर्ने घोषणा गरेको छ । यो ‘सेन्ट्रलाइज्ड ड्यासबोर्ड’ प्रयोगकर्तालाई आफ्नो खातालाई सजिलै सुरक्षित गर्न मद्दत गर्न डिजाइन गरिएको हो ।

यो उपकरण एपमा रहेको ‘सुरक्षा र अनुमति’ विकल्पअन्तर्गत ‘सेटिङ्स र गोपनीयता’ खण्डमा फेला पार्न सकिन्छ । यसले विभिन्न सुरक्षा विकल्प प्रदान गर्छ, जस्तै तपाईंको खातालाई फोन नम्बर वा इमेल ठेगानामा लिंक गर्ने, लगइन गर्ने ब्याकअप विधि सुनिश्चित गर्न, दुई–कारक प्रमाणीकरण सक्षम र अनुहार पहिचान वा फिंगरप्रिन्टजस्ता बायोमेट्रिक प्रमाणीकरण लगइन विकल्प प्रदान गर्छ ।

यसले खातासँग सम्बन्धित उपकरण हेर्ने कुनै पनि अज्ञात वा अब प्रयोगमा नरहेको यन्त्रमा पहुँच रद्द गर्ने, खातामा हुने संदिग्ध गतिविधिको निगरानी गर्ने र उपयुक्त कारबाही गर्न प्रयोगकर्तालाई सचेत गर्ने क्षमता प्रदान गर्छ ।

साइबर आक्रमण बढ्दै गएका बेला टिकटकले यो कदम चालेको हो । ‘सुरक्षा जाँच’ उपकरणमार्फत प्लेटफर्मले खाता टेकओभर वा ह्याकिङको जोखिम कम गर्दै प्रयोगकर्तालाई सुरक्षित अनुभव प्रदान गर्न खोजेको छ ।

टिकटकले विस्तारै यो उपकरणलाई विभिन्न क्षेत्रमा लन्च गर्ने अपेक्षा गरिएको छ । त्यसपछि यसलाई विश्वभरका सबै प्रयोगकर्ताका निम्ति उपलब्ध गराइनेछ । रासस/क्यूएनए