काठमाडौं । नेपाली कांग्रेसका नेता शेखर कोइरालाले ०८२ मंसिरभित्रै महाधिवेशन नगरे पार्टी कमजोर हुने बताएका छन् । मोरङ–काठमाडौं सम्पर्क समितिले आज काठमाडौंमा आयोजना गरेको कार्यक्रममा नेता कोइरालले दबाब नपुगेसम्म नेतृत्व र पदाधिकारीले समयमा महाधिवेशन नगराउने बताए ।

“०८२ मंसिरभित्र महाधिवेशन भएन भने कांग्रेस कमजोर हुँदै जान्छ । अधिवेशन तपाईंजस्ता नेता कार्यकर्तालाई, हामीजस्ता व्यक्तिलाई चाहिएको छ,” कोइरालाले भने, “पार्टी सञ्चालन गरिरहेकाहरूलाई महाधिवेशन चाहिएकै छैन ।”

उनले पदको विलास गरेर बस्नेहरूले विधि र पद्धति ख्यान नगर्ने प्रवृत्ति रहेको बताए । दबाबका लागि सामाजिक सञ्जालबाटै अभियान सुरु गर्नुपर्ने उनको भनाइ छ ।

“सामाजिक सञ्जालमा लेख्नुस्, ०८२ भित्र पार्टीको महाधिवेशन गर्नुपर्छ । यसले धेरै ठूलो दबाब सिर्जना गर्छ,” कोइरालाले भने, “हामी हेरौँ न, पार्टीको महाधिवेशन समयमा गर्न हुँदैन, उपयुक्त छैन भन्न कसले सक्दो रहेछ ।”