काठमाडौं । देशका केही स्थानमा अबका तीन दिन वर्षाको पूर्वानुमान गरिएको छ । तर, निरन्तर र ठूलो वर्षा नहुने मौसम पूर्वानुमान महाशाखाले स्पष्ट पारेको छ ।

पश्चिमी र स्थानीय वायुको प्रभावले वर्षा हुनेछ । यसमा पश्चिमी वायुको भूमिका प्रमुख हुने र त्यो सक्रिय हुन लागेको महाशाखाका मौसमविद् प्रतिभा मानन्धरले जानकारी दिइन् ।

“विशेष गरी पश्चिमी र स्थानीय वायु दुवैको प्रभाव रहने देखिन्छ,” उनले बाह्रखरीसित भनिन्, “अबको तीन दिन बदली/हल्का वर्षाको सम्भावना छ ।”

शुक्रबार (चैत ८)देखि तीन दिन देशका केही भूभागमा बदली (आकाशमा बादल) र वर्षाको अवस्था रहने उनले बताइन् । यसको प्रभाव पूर्वमा बढी हुने उनले जानकारी दिइन् ।

“पूर्वी भूभागमा बढी प्रभाव देखिन्छ । पश्चिममा कम छ, पूर्व र मध्य भूभागमा प्रभाव बढी हुन्छ,” उनले भनिन् ।

उनका अनुसार, पूर्वी नेपालमा यसको प्रभाव देखिन सुरु भइसकेको छ । “गए रातिदेखि नै बादलहरू प्रवेश गरिसकेको छ,” उनले भनिन्, “कोसी प्रदेशमा छिटपुट पानी पर्न सुरु भइसक्यो ।” 

कोसी, मधेस, वाग्मती, गण्डकी र कर्णाली प्रदेशका थोरै भूभागमा वर्षाको सम्भावना छ । उच्च पहाडी तथा हिमाली भूभागका एक/दुई स्थानमा हल्का हिमपातको पनि सम्भावना रहेको महाशाखाले जनाएको छ ।

काठमाडौंमा पनि पानी पर्ने सम्भावना छ । “काठमाडौंमा घाम–बादल, घाम–बादल हुनेछ,” उनले भनिन्, “काठमाडौंमा पनि छिटपुट वर्षाको सम्भावना छ ।”

मेघगर्जन/चट्याङसहित वर्षाको सम्भावना रहेको उनले बताइन् । हाल प्रिमनसुन अवधि हो । प्रिमनसुनमा मेघगर्जन/चट्याङ, हावाहुरीको सम्भावना हुने महाशाखाले जनाएको छ ।

यस्तो अवस्था तत्काललाई तीन दिनसम्म रहने उनले जानकारी दिइन् । “आजबाट बदलीको अवस्था रहन्छ,” उनले भनिन्, “पर्सि (चैत १०) साँझदेखि मौसममा क्रमिक रूपमा सुधार हुने सम्भावना छ ।”