काठमाडौं । राष्ट्रिय स्वतन्त्र पार्टी (रास्वपा)का सांसद असिम शाहले सेन्सर बोर्डका सदस्यको योग्यतामाथि प्रश्न उठाउँदै राजनीतिक नियुक्ति पाएकालाई पदमुक्त गर्न माग गरेका छन् । आइतबार (चैत ३) प्रतिनिधिसभा बैठकमा उनले यस्तो माग गरेका हुन् ।

“सेन्सर बोर्डमा राजनीतिक नियुक्ति पाएका सबै ननसेन्सर सदस्यहरूलाई पदमुक्त गरी चलचित्र बुझेका मान्छेलाई नियुक्त गर्न म सरकारसँग माग गर्दछु,” उनले भने ।

चलचित्र समाजको ऐना भएको उनले उल्लेख गरे । उनले सरकारले अभिव्यक्ति स्वतन्त्रतामा अंकुश लगाउने काम गरेको आरोप समेत लगाए । उनले भने, “चलचित्र समाजको ऐना हो । त्यही समाजका कुरा चलचित्रमा व्यक्त गर्न सरकारले अभिव्यक्ति स्वतन्त्रतामा अंकुश लगाउने काम गरिरहेको छ ।”

उनले चलचित्रमा अनावश्यक ‘कैँची’ चलाउँदा सरकारको आयु पनि काटिने भन्दै होस गर्न चेतावनी दिए । सेन्सरसिपविरुद्धको चलचित्रकर्मीको आन्दोलनमा उनले ऐक्यबद्धता पनि जनाए । “फिल्ममा अनावश्यक कैँची चलाउँदा सरकारको आयु पनि त्यही कैँचीले काटिएला, होस गर्न आग्रह गर्दछु,” उनले भने ।

सार्वजनिक कार्यक्रममा प्रधानमन्त्री केपी शर्मा ओलीले बोलेको भाषणको दृश्य चलचित्र ‘राजागंज’मा समेटिएकामा आपत्ति जनाउँदै बोर्डले प्रदर्शन अनुमति रोकेको थियो । पछि उक्त अभिव्यक्ति काटेपछि चलचित्र प्रदर्शनको अनुमति दिइएको थियो । न्युज एजेन्सी नेपाल