काठमाडौं । होली मनाउने क्रममा अनुहारमा विभिन्न चमकयुक्त रङहरू (ग्लिटर कलर) प्रयोग गर्नेको संख्या धेरै भेटिन्छ । रमाइलोका लागि लगाइने यस्ता रङले छालामा असर पुर्‍याउन सक्नेतर्फ थोरैमा मात्र सजगता पाइन्छ । यसले होलीपछि छालाासम्बन्धी विभिन्न समस्या लिएर अस्पताल पुग्नेको संख्या बढाएको चिकित्सकहरू बताउँछन् ।

विशेषगरी अनुहारमा प्रयोग ग्लिटर कलरहरू छाला र भित्री अंगहरूका लागि पनि घातक हुने विभिन्न अध्ययनहरूले देखाएका छन् । युनिभर्सिटी अफ वासिङटनले सन् २०२३ मा गरेको एक अध्ययनमा अधिकांश ग्लिटर कलरमा माइक्रोप्लास्टिकको मिसावट हुने उल्लेख छ । जसले छालामात्रै नभई मिर्गौलासम्मलाई असर पुर्‍याउने अध्ययनको निष्कर्ष छ ।

यस्ता रङमा चम्काउन र लामो समय टिकाइरहन तीनवटा तहमा माइक्रोप्लास्टिकको प्रयोग भएको हुन्छ । जसले छालामा भएको मोइस्चर (तेलीय पदार्थ) सोसेर छाला सुक्खा गराउने र एलर्जी निम्त्याउँछ ।

त्यतिमात्र नभई माइक्रोप्लास्टिकयुक्त रङले छालामा भएको पसिना ग्रन्थीलाई ब्लकेज गर्ने भएकाले छालामा दीर्घकालीन समस्याहरू निम्त्याउने जोखिम हुन्छ । यस्ता रङले छालाको बाहिरी सुरक्षा तहलाई ड्यामेज गराउने र आँखामा परेमा दृष्टि नै गुम्न सक्ने युनिभर्सिटीको अध्ययनले देखाएको छ ।

वरिष्ठ छालारोग विशेषज्ञ डा. सविना भट्टराईका अनुसार, सामान्यखाले रङमा मर्करीको मात्रा धेरै हुन्छ । साथै सल्फाइडको मिसावट गरिएको हुन्छ । यसको अधिक प्रयोगले छाला हुँदै कलेजो र मिर्गौलासम्म पनि असर पुर्‍याउँछ ।

यसैगरी निलो रङमा भने प्रुसियन ब्लू नामक रसायन मिसाइएको हुन्छ ।  त्यस्तै, हरियो रङमा कपरको मात्रा धेरै हुन्छ । जुन छालामात्रै नभई कपाल र नङका लागि पनि उत्तिकै हानिकारक हुन्छ । सिल्भर रङमा आल्मुनियमको मात्रा धेरै हुन्छ । यसले छालाको पत्रलाई सुक्खा बनाएर भित्रैसम्म एलर्जी गराउन सक्छ ।

खासगरी रातो, हरियो र चम्किला रङहरूले छालामा स्थायी समस्या ल्याउन सक्छन् । त्यस्तै, नङ पाक्ने, रगतसम्म पुगेर शरीरभरि फैलिएर विभिन्न अंगमा असर गर्नेजस्ता दीर्घकालीन असरहरू यी रङले ल्याउन सक्छन् ।