काठमाडौं । प्रहरीको मानव बेचबिखन अनुसन्धान ब्युरो बबरमहलले सोमबार मानव तस्करीको आरोपमा पक्राउ परेका तीनजनालाई सार्वजनिक गर्‍यो । 

ब्युरोको टोलीले सार्वजनिक गरेकामा दाङ तुल्सीपुर उपमहानरपालिका–१ का कमलकुमार न्यौपाने, नुवाकोट दुप्चेश्वर गाउँपालिका–७ का मानबहादुर तामाङ र सोही ठाउँका सोमबाहादुर तामाङ थिए ।

तामाङद्वय एक युवतीलाई प्रभावमा पारेर भारतमा अवैध काममा लगाएको आरोपमा पक्राउ परेका हुन् । न्यौपानेलाई भने युवायुवतीलाई प्रभावमा पारेर भारत हुँदै तेस्रो मुलुक पठाउँछु भन्दै ठूलो रकम लिएर ठगी गर्ने तथा बन्धक बनाउने गरेको उजुरीका आरोपमा पक्राउ गरिएको हो ।

न्यौपाने उजुरी परेको ६ वर्षपछि पक्राउ परेका हुन् । पक्राउ परेकामाथि ब्युरोको टोलीले थप अनुसन्धान जारी राखेको ब्युरोका एसपी नरेन्द्र कुँवरको भनाइ छ । ब्युरो स्थापना हुनुअघिदेखि नै न्यौपाने प्रहरीको केन्द्रीय अनुसन्धान ब्युरो (सीआईबी)को खोजीमा थिए । तर, प्रहरीलाई उनलाई पक्राउ गर्न ६ वर्ष लाग्यो ।

न्यौपानेले दिल्लीलाई आधार केन्द्र बनाएर युवायुवतीलाई दिल्ली बोलाएर ठगी तथा बन्धक बनाउने गरेका थिए । उनीविरुद्ध दुई महिला र ६ पुरुषगरी आठजनाले जाहेरी दिएका छन् । ब्युरोको टोलीले कमललाई नेपाल–भारत सीमाक्षेत्र कञ्चनपुरबाट पक्राउ गरेको जानकारी गराएको थियो ।

तर, उनलाई दिल्लीबाट नै पक्राउ गरी नेपाल ल्याएको अनुसन्धानमा खटिएका एक प्रहरी अधिकारीले बताए । आफूमाथि प्रहरीमा जाहेरी परेको थाहा पाएपछि कमल नेपाल समेत आउन छाडेका थिए । दिल्ली नै आधार बनाएर उनी मानवतस्करीमा लागेका थिए ।

वैदेशिक रोजगारीका लागि युरोपदेखि अमेरिकासमेत पठाउने प्रलोभन देखाएर लाखौँ रुपैयाँ लिएर ठगी तथा बन्धक बनाउने धन्दामा न्यौपाने थिए ।

न्यौपानेबाहेक मानवबेचबिखनमा संलग्न दाङकै प्रतीक शर्मा भन्ने पीताम्बर कँडेल भने हाल दिल्लीस्थित तिहाड जेलमा छन् । उनी लागुऔषध मुद्दामा दिल्लीमा पक्राउ परेका थिए ।

भारतमा कमल शर्माको नामबाट कागजात

दाङका कमलकुमार न्यौपाने भारतमा भने कमलकुमार शर्माको नामबाट परिचित थिए । उनी प्रहरीको खोजी सूचीमा परेपछि पक्राउबाट जोगिन भारतीय नागरिक नै बनेका हुन् ।

मावनतस्करीमै संलग्न कँडेलसमेत प्रतीक शर्माको नामबाट भारतीय कागजात बनाएका थिए । प्रहरीले पक्राउ गरेका कुमार न्यौपानेको साथबाट प्रहरीले कमलकुमार शर्माको नाममा बनाएको भारतीय आधार कार्ड समेत बरामद गरेको छ ।

यसरी नै भारतीय ड्राइभिङ लाइसेन्स, भारतीय स्थायी लेखा नम्बर र तीनवटा भारतीय बैंकको डेबिड कार्डसमेत बरामद भएको ब्युरोका एसपी नरेन्द्र कुँवरले जानकारी दिए ।