काठमाडौं । यूईएफए च्याम्पियन्स लिग अन्तिम–१६ को दोस्रो लेगमा आज क्याटालन जायन्ट बार्सिलोनाले पोर्चुगिज क्लब बेन्फिकालाई आतिथ्यता प्रदान गर्दै छ ।

नकआउट चरणको पहिलो लेगमा बार्सिलोनाले बेन्फिकाविरुद्ध उसैको मैदानमा १–० को कठिन जित निकालेको थियो । बार्सिलोना खेलको पहिलो हाफमै १० खेलाडीमा समेटिएको थियो । तर, बार्सिलोनाका राफिन्हाले दोस्रो हाफमा निर्णायक गोल गरेका थिए ।

प्रतियोगिताको क्वार्टरफाइनलमा स्थान बनाउन आज बार्सिलोनालाई बराबरीको नतिजा पर्याप्त छ । पोर्चुगिज टिमलाई भने च्याम्पियन्स लिगको यात्रा कायम राख्न जित्नैपर्ने दबाब छ ।

खेलको पूर्वसन्ध्यामा बार्सिलोनाका मुख्य प्रशिक्षक हेन्सी फ्लिकले बेन्फिका अवे मैदानमा पनि जित निकाल्न सक्ने टिम भएकाले आफूहरू सजग रहेको प्रतिक्रिया दिए । “उनीहरूको टिम राम्रो छ । हामीले गर्नुपर्ने सबैभन्दा राम्रो कुरा भनेको पहिलो लेगलाई बिर्संदै यो खेलमा केन्द्रित रहनु हो । उनीहरू बलियो आक्रमण बुन्छन् । यस कुरामा उनीहरू निकै राम्रा छन् र बेन्फिकाले धेरै अवे खेल पनि जितेको छ । हामी त्यसबारे सजग बन्नुपर्छ,” फ्लिकले भने ।

च्याम्पियन्स लिगको यसै सिजनमा बार्सिलोना र बेन्फिकाबीच दुईपल्ट प्रतिस्पर्धा भइसकेको छ । लिग चरणमा पनि बार्सिलोनाले पोर्चुगिज क्लबविरुद्ध उसैको मैदानमा ५–४ को रोमाञ्चक जित निकालेको थियो ।

बार्सिलोना पछिल्लो ६ खेलयता अपराजित छ । यी ६ मध्ये स्पेनिस टिमले पाँच खेलमा जित निकाल्दा एकमा बराबरीको नतिजा आत्मसात् गरेको थियो । बेन्फिकाले भने पछिल्लो ६ मध्ये चार खेलमा जित, एकमा बराबरी र एकमा हार व्यहोरेको थियो ।

बेन्फिकाका प्रशिक्षक ब्रुनो लेजले आफ्नो टिमको लक्ष्य आत्मविश्वासी बन्नु रहेको बताए । “हाम्रो लक्ष्य भनेको आत्मविश्वासी बन्नु हो । उनीहरूविरुद्ध खेल्दा हामीले धेरै अवसर सिर्जना गरेका थियौँ । र, हामीलाई ती दुवै खेलमा नतिजा फरक हुनुपर्थ्यौ जस्तो लाग्छ,” लेजले भने ।

बार्सिलोनाको मैदान स्टाडियो ओलिम्पिक लुई कम्पनीज्मा यो खेल नेपाली समयननुसार राति ११ः३० बजे सुरु हुने तालिका छ ।