काठमाडौं । नेपाल प्रहरीका महानिरीक्षक (आईजीपी) वसन्तबहादुर कुँवर आउँदो चैत ५ गते अनिवार्य अवकाशमा जाँदै छन् । प्रहरीको ३० वर्षे सेवा अवधिका कारण उनी अवकाशमा जान लागेका हुन् ।

आईजीपी कुँवरसँगै तत्कालीन समयमा प्रहरी निरीक्षकमा भर्ना भएका संगठनका अरू उच्च अधिकारी समेत अवकाशमा जान लागेका छन् । अवकाशमा जाने अधिकारीहरूमा पाँच अतिरिक्त महानिरीक्षक (एआईजी) र तीन प्रहरी नायब महानिरीक्षक डीआईजी छन् ।

अवकाशमा जान लागेका एआईजीहरूमा प्रहरी प्रधान कार्यालय प्रशासन विभाग प्रमुख टेकप्रसाद राई, मानव स्रोत विभाग प्रमुख दुर्गासिंह चन्द, अपराध अनुसन्धान विभाग प्रमुख कुबेर कडायत, कार्यविभाग प्रमुख बुद्धिराज गुरुङ र जनकराज भट्टराई छन् ।

यस्तै, डीआईजीहरू सुदूरपश्चिम प्रदेश प्रहरी प्रमुख गणेश चन्द, भोलाबहादुर रावल र ध्रुवबहादुर राउत अवकाशमा जाँदै छन् ।

उनीहरू सबै आईजीपी कुँवरसँगै ०५१ चैत ५ मा प्रहरी निरीक्षकबाट संगठनमा प्रवेश गरेका थिए । प्रहरी नियमावलीअनुसार ३० वर्षे सेवाहदका कारण उनीहरू एकैसाथ अवकाशमा जान लागेका हुन् ।

कुँवरले अवकाश पाउने भएसँगै ०५२ भदौदेखि प्रहरी सेवा सुरु गरेका एआईजीहरू दीपक थापा, सुदीप गिरी र टेकप्रसाद राईमध्ये एकजना आईजीपी हुनेछन् ।

एआईजी थापा हाल प्रहरीको केन्द्रीय अनुसन्धान ब्युरो (सीआईबी), गिरी राष्ट्रिय प्रहरी प्रशिक्षण प्रतिष्ठान र तामाङ उपत्यका प्रहरी कार्यालयका प्रमुख छन् ।