काठमाडौं । चाँदी तस्करीमा संलग्न पाँचजनालाई प्रहरीले पक्राउ गरेको छ । पक्राउ पर्नेमा बाराका सन्तोषकुमार साह, गणेश साह, प्रेमकुमार कुशवाह, विपना सार्की र पर्साका दिनानाथ साह सुनार छन् ।

उनीहरूका साथबाट प्रहरीले २० किलो चाँदी बरामद गरेको छ । नेपाल प्रहरीको उपत्यका अनुसन्धान कार्यालयबाट खटिएको टोलीले मंगलबार (फागुन २१) काठमाडौं–३२, नरेफाँटबाट उनीहरूलाई पक्राउ गरेको हो । टोली डीएसपी रोशन खड्का नेतृत्वमा थियो ।

उनीहरूले भारतको रक्सौलबाट चाँदी तस्करी गर्ने गरेको प्रहरीको प्रारम्भिक अनुसन्धानका क्रममा खुलेको छ । उक्त समूहले लामो समयदेखि चाँदीको तस्करी गरिरहेको प्रहरीले जनाएको छ ।

चाँदी तस्करीका ‘मुख्य’ आरोपित सन्तोष साहले प्रारम्भिक बयानमा प्रहरीसित भनेका छन्, ‘‘मैले यो तेस्रोपटक ल्याएको हो । एकपटकमा ल्याउँदा १५ देखि २० किलो चाँदी ल्याउने गरेको छु । भारतबाट भारतीय र वीरगन्जबाट आफैँले भरियाका रूपमा राखेका दुईजनाले चाँदी काठमाडौं ल्याउने काम गर्थे ।’’

उनीसँगै पक्राउ परेका प्रेम र गणेशलाई चाँदी तस्करीको भरियाका निम्ति प्रयोग गरिएको खुलेको छ ।

सन्तोषले चार वर्षअघि बाराको कलैयामा शुभलक्ष्मी सुनचाँदी पसल खोलेका थिए । तर, पसल सञ्चालन गर्न लिएको ब्याजको रकम तिर्न नसकेर बिक्री गरेको उनले बताएका छन् । पसल बिक्रीपछि उनी वैदेशिक रोजगारीका निम्ति दुबई पुगेको खुलेको प्रहरीले जनाएको छ ।

उनी करिब एक वर्ष दुबई बसे । चितवनमा होटेल समेत सञ्चालन गरेका थिए । सुन पसल, वैदेशिक रोजगारी र होटेल व्यवसायबाट पनि सन्तोषजनाक कमाइ गर्न नसकेपछि उनी चाँदी तस्करीमा लागेको खुलेको छ । पक्राउ परेका अरू आरोपितले सन्तोषको योजनामा काम गर्ने गरेको बताएका प्रहरीले जनाएको छ ।

भरियाको कमाइ एकपटकमा १० हजारसम्म
सन्तोषले प्रेम र गणेशलाई तस्करीको चाँदी भरियाका रूपमा मात्र प्रयोग गर्ने गरेका थिए । उनीहरूले एक महिनामा तीनपटकसम्म पर्साबाट तस्करीको चाँदी काठमाडौं ल्याउने काम गर्थे ।

त्यसरी भारतबाट प्रत्येकपल्ट तस्करीको चाँदी १५ किलो ल्याउँदा जनही आठ हजार रुपैयाँ पाउँथे । २० किलो ल्याउँदा १० हजार रुपैयाँ पाउने गरेका थिए । तस्करीको चाँदी काठमाडौं ल्याउन उनीहरूले ना४१प ३३४६ नम्बरको मोटरसाइकल प्रयोग गर्थे ।

उनीहरूले भारतबाट चाँदीका दाना तस्करी गरेर नेपाल ल्याउने गरेको खुलेको छ । त्यसरी ल्याएको चाँदी नरेफाँटमा स्टोर गरेर राख्ने गरिएको प्रहरीको अनुसन्धानका क्रममा थाहा भएको छ ।

तस्करीको चाँदी उनीहरूले काठमाडौंका सुनचाँदी व्यवसायीलाई मात्र बिक्री गर्ने गरेका थिए । सुनचाँदी व्यवसायीकै मागानुसार आफूले भारतबाट चाँदी तस्करी गर्ने गरेको सन्तोषले प्रहरीसमक्ष बताएका छन् ।

उक्त कार्यालयका एसपी काजीकुमार आचार्यले चाँदीसहित पक्राउ परेका पाँचजनालाई थप अनुसन्धानका निम्ति राजस्व अनुसन्धान विभागमा पठाइने बताए ।

प्रहरीले बरामद गरेको चाँदीको मूल्य ३४ लाख रुपैयाँबराबर हुन आउँछ । बुधबार नेपाल बजारमा चाँदीको मूल्य तोलाको एक हजार ९५० रुपैयाँ कायम छ ।