काठमाडौं । स्पेनिस ला लिगाअन्तर्गत भियारियाल र स्पान्योलबीचको खेल बाढीको सम्भावनाका कारण स्थगित भएको छ । 

भियारियालले मंगलबार सामाजिक सञ्जालमार्फत बाढीका कारण घरेलु मैदान एल माड्रिगलमा हुने तालिका रहेको खेल स्थगित भएको जनाएको हो । तालिकाअनुसार यी दुई टिमबीचको खेल मंगलबार राति हुने तय भएको थियो । 

“क्यास्टोलिनमा खराब मौसम तथा बाढीको चुनौतीका कारण, व्यावसायिक प्रतियोगिताका निर्णायकले आज तालिकाअनुुसार भियारियाल एफसी र स्पान्योलबीचको खेल स्थगित गर्ने निर्णय गरेका छन्,” भियारियालले जारी गरेको विज्ञप्तिमा उल्लेख छ ।

यस विषयमा स्पेनिस फुटबल संघले ला लिगा र क्लबले पाँच दिनभित्रमा नयाँ खेल मिति र स्थान निर्धारण गर्नुपर्ने जनाएको छ ।

यसअघि ला लिगाले गत अक्टोबरमा पनि पूर्वी कोस्टल सिटीमा भीषण आगलागीका कारण भ्यालेन्सियाको खेल स्थगित गरेको थियो ।