काठमाडौं । जनता समाजवादी पार्टीका अध्यक्ष उपेन्द्र यादवले भूमिसम्बन्धी अध्यादेश फिर्ता लिन सरकारलाई आग्रह गरेका छन् । पार्टीले शुक्रबार काठमाडौंमा गरेको अन्तर्क्रिया कार्यक्रममा उनले वैज्ञानिक बाटो अपनाएर रियल सुकुम्बासीको समस्या अन्त्य गर्नुपर्ने बताए ।

आफन्तलाई जग्गा बाँडेर सुकुम्बासीको समस्या समाधान नहुने बताए । “सुकुम्बासीको नाममा हुकुमबासीले वन फँडानी गर्ने, जग्गा हडप्ने, कमाउने, जग्गा बिक्री गर्ने र मुलुकलाई बर्बाद गर्ने धन्दा बन्द गर्नुपर्छ,” उनले भने ।

यादवले सरकार विचौलियासँग मिलेर अहिले सांसद खोज्दै हिँडेको आरोप लगाए । अध्यादेश पारित गर्नका लागि विचौलियाहरूले करोड, अर्ब दिन तयार रहेको आफूले सुनेको बताए । “कृषि उत्पादन बढाउने, गरिबी, बेरोजगारी हल गर्नेतिर ध्यान छैन । माफिया, विचौलियासँग मिलेर तीनका पैसा लिने, पार्टी फुटाउने, कार्यकर्ता खोज्ने,” उनले भने, “अहिले सांसद खोज्दै हिँडेका छन् । यो पास गराउन, कति करोड, अरब चाहिन्छ विचौलिया दिन तयार छन् । ती खोज्दै हिँड्ने धन्दा बन्द गर्नुस् ।” त्यो धन्दामा लाग्नुजस्तो देशघाती काम केही नहुने उनको भनाइ छ ।

उनले अध्यादेश फिर्ता नलिए आन्दोलन गर्ने चेतावनी दिए । “यो अध्यादेश सरकारले फिर्ता लेओस् । हैन सांसद खरिदबिक्री गरेर यदि पास गराउँछ भने जनताका बीचमा जान्छौँ । आन्दोलनका बाटो पकडिन्छौँ,” उनले भने ।

राष्ट्रियसभामा बहुमत नुहँदा सरकारले अध्यादेश अघि बढाउन सकेको छैन । माघ १८ गतेको संसद् बैठकमा अध्यादेश पेस भएको थियो । एक महिना पुग्न लाग्दा पनि अध्यादेश अलपत्र छ । फागुन २१ गतेको बैठकमा अध्यादेश अघि बढाइने नेताहरू बताउँछन् । जसपा नेपाल अध्यादेशको विपक्षमा उभिएपछि सरकार अफ्ठ्यारोमा छ ।