काठमाडौं । नेपाल उद्योग वाणिज्य महासंघका अध्यक्ष चन्द्रप्रसाद ढकालले सरकार, राजनीतिक दल, प्रशासन र निजी क्षेत्र एउटै डुंगाका यात्री भएको बताएका छन् । संघीय मामिला तथा तथा सामान्य प्रशासन मन्त्रालयले मंगलबार आयोजना गरेको 'संघीय संरचनामा लगानी प्रवर्द्धनः सम्भावना, चुनौती र निजी क्षेत्रको अपेक्षा' कार्यक्रममा अध्यक्ष ढकालले अर्थतन्त्र सुधारको लागि सबै पक्ष गम्भीर बन्नु पर्ने बताए ।  

अध्यक्ष ढकालले नेपालमा लगानीको पर्याप्त सम्भावना भए पनि सोहीअनुरुपको समग्र वातावरण नहुँदा राज्यले प्रतिफल पाउन नसकेको बताए । उनले देश विकासका लागि लगानी प्रवर्द्धन आवश्यक रहेको र यसका लागि सबै राजनीतिक दल, प्रशासन संयन्त्र र निजी क्षेत्र उत्तिकै जिम्मेवार हुनु पर्ने धारणा राखेका छन् ।

“सरकार, राजनितिक दल, प्रशासन र निजी क्षेत्र हामी एउटै डुंगाका यात्री हौँ । डुंगामा क्षति पुग्दा एउटा पक्ष सुरक्षित र अर्को असुरक्षित भन्ने हुँदैन । यसकारण देशको अर्थतन्त्र बलियो बनाउन हामी सबै उत्तिकै जिम्मेवार छौँ र हुनुपर्दछ,” उनले भने ।  

अध्यक्ष ढकालले लगानी प्रवर्द्धनका लागि राजनीतिक एवं नीतिगत अस्थिरता, संघीय सरकारका तहहरूबीचको अन्तरसम्बन्ध र समन्वयको अभाव, निजी क्षेत्र प्रोत्साहन गर्ने कार्यक्रमको कमी, विकास आयोजनामा अवरोध मुख्य चुनौती रहेको बताए ।  

लगानी प्रवर्द्धनका लागि प्रशासनिक सरलता र पारदर्शिता र सबै तहबाट लगानीको सुरक्षाको ग्यारेन्टी आवश्यक भएको बताउँदै ढकालले सरकार वा निजी क्षेत्रबाट प्रवर्दित पूर्वाधार एवं विकास परियोजना निर्वाध रूपमा सञ्चालन गर्ने वातावरण बनाउनुपर्नेमा जोड दिए ।

तीनैतहका सरकार राजस्व केन्द्रित हुनु, व्यवसाय दर्ता नवीकरण एवं अन्य सेवा प्रवाह चुस्त नहुनु औद्योेगिक व्यवसाय ऐनमा एकरूपता नहुने जस्ता समस्याले गर्दा अपेक्षा अनुरुप लगानी र व्यवसाय प्रवर्द्धन हुन नसकेको धारणा राखे ।