काठमाडौं । परराष्ट्रमन्त्री आरजु राणा देउवाले नेपाली विद्यार्थी प्रकृति लम्सालको मृत्यु र त्यसपछि विकसित परिस्थितिलाई निरन्तर ‘फलोअप’ गरिरहेको बताएकी छन् । ओमनको मस्कटमा रहेकी परराष्ट्रमन्त्री राणाले सामाजिक सञ्जाल फेसबुकमा लामो स्टाटस लेख्दै उक्त कुरा बताएकी हुन् ।
 
“भारतको ओडिसास्थित कलिंगा इन्स्टिच्युट अफ इन्डस्ट्रियल टेक्नोलोजी (केआईआईटी) विश्वविद्यालयको होस्टेलमा नेपाली विद्यार्थी प्रकृति लम्सालको मृत्यु र त्यसपछि विकसित परिस्थितिलाई हामीले निरन्तररूपमा फलोअप गरिरहेका छौँ,” परराष्ट्रमन्त्री राणाले भनेकी छन् ।

नेपाली विद्यार्थीको अवस्था बुझ्न र त्यहाँ रहेका नेपाली विद्यार्थीलाई कलेजमा सुरक्षाको वातावरण मिलाउन नयाँदिल्लीस्थित नेपाली दूताबासबाट नेपाल प्रहरीका दुइजना बरिष्ठ अधिकारीलाई मंगलबार बिहान विश्वविद्यालय पुगेको उनले बताएकी छन् ।
  
“मैले उहाँहरूसँग फोनमा कुरा गरी घटनाको आवश्यक अनुसन्धानका लागि भारतीय सुरक्षाकर्मीसँग समन्वय गर्न तथा नेपाली विद्यार्थीलाई आवश्यक सहयोग र होस्टलमा सुरक्षित रूपमा रहनका लागि विश्वविद्यालय प्रशासनसँग समन्वय गर्न निर्देशन दिएकी छु,” उनले  भनेकी छन् ।
 
यस विषयमा परराष्ट्र मन्त्रालय र नेपाली दूतावास दिल्लीले विश्वविद्यालय प्रशासन र भारतीय सुरक्षा अधिकारीको सम्पर्कमा रहेर आवश्यक समन्वयका साथ काम गरिरहेका उनले बताएकी छन् ।