काठमाडौं । विमला चौधरीको निर्णायक गोलप्रेरित नेपालले घरेलु मैदानमा जारी चारदेशीय अन्तर्राष्ट्रिय महिला च्याम्पियनसिपमा कीर्गिस्तानविरुद्ध १–० को कठिन जित निकालेको छ ।

सोमबार त्रिपुरेश्वरस्थित दशरथ रंगशालामा सम्पन्न खेलमा नेपाललाई अंक दिलाउन विमला चौधरी निर्णायक बनिन् । विमलाले १०औँ मिनेटमा हेडर गोल गर्दै घरेलु समर्थकमाझ आफ्नो टोलीलाई अग्रतामा राखेकी थिइन् । राइट साइडबाट सविता रानामगरले निकालेको क्रसमा बक्सभित्र अनमार्क रहेकी विमलाले सहजै हेडर गोल गरिन् ।

त्यसअघि पहिलो हाफको इन्जुरी समयमा नेपालको प्रहार दुई पटक पोस्टमा लागेर फर्किदा नेपालले अग्रता दोब्बर बनाउन सकेन । खेलको अधिकांश समय बलमाथि नियन्त्रण बनाएको नेपालले करिब आधा दर्जन गोलका अवसरको सदुपयोग गर्न सकेन ।

जितसँगै तीन अंक जोडेको नेपाल तालिकाको दोस्रो स्थानमा उक्लिएको छ । समान खेलबाट समान अंक जोडे पनि म्यानमार गोलआधारमा नेपालभन्दा माथि छ । आजदेखि सुरु भएको प्रतियोगितामा नेपाल र कीर्गिस्तानसँगै म्यानमार र लेबनानको सहभागिता छ । यसअघि आजै भएको पहिलो खेलमा म्यानमारले लेबनानविरुद्ध ३–१ को जित निकालेको थियो ।