काठमाडौं । राष्ट्रिय स्वतन्त्र पार्टी (रास्वपा)का सांसद शिशिर खनालले मंगलबारको प्रतिनिधिसभा बैठकको आकस्मिक समयमा बोल्दै एउटा सन्देश सुनाए । सन्देश अस्कल क्याम्पसमा पढ्ने एक विद्यार्थीको थियो । विद्यार्थीले पठाएको म्यासेज थियो, “कक्षाकोठामा सधैँ उहाँहरूको दादागिरी चल्थ्यो । तर, अब पुलिसले पनि आँट नगरेपछि कसरी पढ्ने होला र ?’’

ती विद्यार्थीले ड्युटीमा रहेका प्रहरीलाई कुट्ने अमृत साइन्स क्याम्पस (अस्कल) पढ्ने अनेरास्ववियुका नेतालाई सम्बोधन गरेर सांसद खनाललाई यसबारे संसद्मा प्रश्न उठाइदिन अनुरोध गरेका थिए ।

यही म्यासेजपछि खनालले गृहमन्त्री रमेश लेखकलाई कुन नैतिकताले कुर्सीमा बस्ने भन्दै प्रश्न मात्रै गरेनन् जवाफ समेत मागे । गएको बिहीबार अस्कलका अखिल नेता कमलराज जोशीसहितको समूहले ड्युटीमा रहेका दुई प्रहरीमाथि कुटपिट गरेका थिए ।

तर, प्रहरीले जोशीलाई जोगाएपछि प्रहरीदेखि गृहमन्त्रीसम्मको आलोचना हुन थालेको हो । घटनामा संलग्न अन्य पाँचजनामाथि भने प्रहरीले मुद्दा चलाएको छ । जसमध्ये दुईजना पक्राउ परेका छन् ।

आइतबार ताप्लेजुङको फुङलिङ नगरपालिका–१ घर भएका २६ वर्षीय दिनेश सिग्देल र डडेल्धुराको गन्यापधुरा गाउँपालिका–५ का २२ वर्षीय रमेश फुलारालाई काठमाडौं प्रहरीले पक्राउ गरेको हो ।  

दुवैजना अस्कल क्याम्पसको नेकपा (एमाले)को विद्यार्थी संगठन अनेरास्ववियुमा आबद्ध छन् । अन्य तीनजना गोपालबहादुर शाही, नवीन ऐरी, सौजन्य शाहीविरुद्ध पनि पक्राउ पुर्जी जारी भएको छ । यद्यपि, उनीहरू भने फरार छन् । प्रहरीमाथि आक्रमण हुँदा उनीहरूसँगै रहेका जोशीलाई भने प्रहरीले उन्मुक्ति दिएको छ ।

पक्राउ परेकाहरूमथि प्रहरी अभद्र व्यवहारको कसुरमा अनुसन्धान थालिएको छ । एमालेको माथिल्लो तहबाट नै जोशीलाई जोगाउन दबाब आएपछि पछि हटेको केही प्रहरी अधिकारी नै स्वीकार गर्छन् । आर्चश्य कुरा के हो भने, जोशीकै आडमा अन्य युवाहरूले प्रहरीमाथि हातपात गरेका हुन् । उनीहरूले प्रहरी वृत्त दरबारमार्गमा कार्यरत प्रहरी हवल्दार जगुलाल चौधरी र जवान नगेन्द्रराज विष्टमाथि कुटपिट गरेका थिए ।

मोटरसाइकलसहित प्रहरीको क्विक रेस्पोन्स टिम (क्यूआरटी)मा खटिएका उनीहरू मध्यराति कुटिएका थिए । जोशीसहितका युवाहरूले उनीहरू सवार मोटरसाइकल समेत तोडफोड गरेका थिए । यद्यपि, प्रहरीले भने सीसीटीभी फुटेजमा जोशीले प्रहरीमाथि हातपात गरेको नदेखिएपछि उनीविरुद्ध मुद्दा नचलाइएको जिकिर गरेको छ । तर, अन्य युवाहरूले प्रहरीले कुटपिट गर्दा जोशीले प्रहरीलाई औँलो ठड्याउँदै चेतावनीकै शैलीमा बोलेको देखिन्छ ।

राजनीतिको आडमा अपराध कर्म
प्रहरीमाथि कुटपिटमा संलग्न हुँदा पनि जोगाइएका जोशीको पृष्ठभूमि आपराधिक देखिएको छ । यसअघि उनीमाथि पटक–पटक मुद्दा चलेको प्रहरीको क्रिमिनल रेकर्ड (सीआरएस)मा  छ । तर, उनी एमालेको विद्यार्थी राजनीतिका कारण जोगिँदै आएका छन् । उनी बझाङकै अर्का विवादित एमाले नेता ऐन महरनिकट छन् ।

बझाङको दुर्गाथली गाउँपालिका–४ का २९ वर्षीय जोशीसहितका समूहले अस्कल क्याम्पसकै विद्यार्थी विकास राईलाई आक्रमण गरेका थिए । उनीमाथि ज्यान मार्ने उद्योगमा २०७९ माघमा जिल्ला अदालतमा मुद्दा नै दायर भएको थियो ।

त्यो बेला समेत उनलाई पक्राउ नपरी प्रतिवादी मात्रै बनाइएको थियो । त्यतिबेला पनि हाल पक्राउ परेका दिनेश र हाल फरार रहेका गोपाल समेत सहभागी थिए ।

त्यो घटनालगत्तै २०८० कात्तिकमा जोशीले पुनः अस्कल क्याम्पसकै प्रमुख डा. लोकबहादुर बरालमाथि आक्रण गरेका थिए । त्यो बेला भने उनी पक्राउ परेका थिए । पछि उनी धरौटीमा छुटे ।

यी बाहेक उनीमाथि लिखत किर्ते र अभद्र मुद्दा समेत छन् । उनलाई भने प्रहरीले उन्मुक्ति दिएको छ । तर, एक प्रहरी अधिकारीले भने पीडित प्रहरीलाई सोधपुछ गर्दा जोशीले आफूहरूमाथि कुटपिट नगरेको बताएका थिए । त्यसैले उनीविरुद्ध मुद्दा नचलेको जनाइएको छ ।