काठमाडौं । अमेरिकी राष्ट्रपति डोनाल्ड ट्रम्पले गाजाका प्यालेस्टिनीहरूलाई अस्वीकार गर्ने देशहरूलाई अमेरिकी सहायता रोक्ने चेतावनी दिएका छन् । “यदि ती देशहरूले प्यालेस्टिनीहरूलाई स्थान दिएनन् भने म उनीहरूको सहयोग बन्द गर्नेछु,” राष्ट्रपति ट्रम्पले भनेका छन् ।

जोर्डनका राजा अब्दुल्लाह द्वितीय वासिङ्टन डीसी पुगेका छन् । उनले मंगलबार ह्वाइट हाउसमा राष्ट्रपति डोनाल्ड ट्रम्पलाई भेट्दै छन् ।

यसैबीच, एक पत्रकारले ओभल अफिसमा राष्ट्रपति ट्रम्पलाई ‘राजा अब्दुल्लाहलाई थप प्यालेस्टिनीहरूलाई स्वीकार गर्न कसरी मनाउनुहुन्छ ?’  भनी प्रश्न गरेका थिए ।

जवाफमा राष्ट्रपति ट्रम्पले भने, “मलाई लाग्छ कि उनी (राजा अब्दुल्लाह) सहमत हुनेछन् र मलाई लाग्छ अन्य देशहरू पनि यसमा सहमत हुनेछन् । उनीहरू सबै उदार स्वभावका छन् ।”

राष्ट्रपति ट्रम्पले फेब्रुअरी ४ मा गाजा पट्टीमा अमेरिकी नियन्त्रणको प्रस्ताव गरेका थिए । उनले गाजा पट्टीमा अमेरिकाले काम गर्ने बताएका थिए ।

यसअघि, ट्रम्पले प्यालेस्टिनीहरू इजिप्ट र जोर्डनमा स्थायीरूपमा बसोबास गर्नुपर्ने पनि बताएका थिए । यद्यपि, जोर्डनलगायत त्यस क्षेत्रका अन्य देशहरूले ट्रम्पको सुझावमा आपत्ति जनाएका थिए ।

‘यदि जोर्डन र इजिप्टले प्यालेस्टिनीहरूलाई गाजाबाट आफ्नो देश लैजान सहमत नभए के उनीहरूलाई दिइने सहयोग रोकिनेछ ?’ भनी सोधिएको प्रश्नमा ट्रम्पले भने, “हो, यो सम्भव हुन सक्छ, किन नहुने ? यदि तिनीहरूले त्यसो गरेनन् भने, म सहायता रोक्नेछु ।”

बीबीसीबाट ।