काठमाडौं । सभामुख देवराज घिमिरेले प्यालेस्टाइनी लडाकु समूह हमासबाट अपहरित नेपाली विद्यार्थी विपीन जोशीको शीघ्र रिहाइका निम्ति पहल गरेका छन् । अरब संसद्का अध्यक्ष मोहम्मद अहमद अल–यमाहीलाई शुक्रबार पत्र लेख्दै उनले विपीनको सकुशल रिहाइका निम्ति पहल गरिदिन आग्रह गरेका हुन् ।

“नेपाल र अरब लिगबीचको सौहार्दपूर्ण सम्बन्धलाई ध्यानमा राख्दै म तपाईंलाई अक्टोबर ७, २०२३ देखि हमासद्वारा बन्दी बनाइएका नेपाली विद्यार्थी विपीन जोशीको यथाशीघ्र रिहाइका लागि पहल र सहयोगका लागि अनुरोध गर्दछु,” पत्रमा भनिएको छ ।

विपीनलाई सकुशल स्वदेश फर्काउन अरब लिगले सहयोग पुर्‍याउने उनले विश्वास व्यक्त गरेका छन् । पत्रमा सभामुख घिमिरेले भनेका छन्, “नेपाल सरकारले हालै इजरायल र हमासबीच भएको युद्धविराम तथा बन्दी आदानप्रदान सम्झौताको लागि स्वागतयोग्य दृष्टिकोण लिएको स्मरण गराउँदछु ।”

हमासले सन् २०२३ अक्टोबर ७ मा इजरायलमा गरेको आक्रमणपछि विपीनसहितका व्यक्तिहरूलाई बन्दी बनाएको हो । उनको रिहाइका निम्ति सरकारले कूटनीतिक पहल गरिरहेको छ ।

नेपालका निम्ति इजरायली राजदूत श्मुलिक आरी बासले गएको आइतबार सभामुखसँगको भेटमा विपीनको रिहाइका लागि संसदीय कूटनीति समेत प्रयोग गर्न सकिने सुझाव दिएका थिए । हालै इजरायल र हमासबीच भएको युद्धविराम तथा बन्दी आदानप्रदानसम्बन्धी सम्झौताको नेपाल सरकारले स्वागत गरेको समेत सभामुख घिमिरेले पत्रमा उल्लेख गरेका छन् ।

उनले नेपाल सार्क, बिम्स्टेकजस्ता क्षेत्रीय तथा उपक्षेत्रीय संरचनामा सक्रिय रूपमा सहभागी हुँदै आएको स्मरण गराएका छन् । नेपाल र अरब लिगबीच थप सहकार्यको आवश्यकतामा उनले जोड दिएका सभामुखको सचिवालयले जानकारी गराएको छ ।