काठमाडौं । प्रधानमन्त्री कप पुरुष क्रिकेट काठमाडौं जिल्ला छनोटमा लगातार दोस्रो जित निकाल्ने क्रममा महावीर स्टडिज एन्ड एथलेटिक्स सेन्टरले थर्ड आई युथ क्लबलाई हराएको छ । शनिबार मूलपानी क्रिकेट मैदान (माथिल्लो)मा महावीरले थर्ड आई युथ क्लबविरुद्ध ६८ रनको जित निकालेको हो ।

महावीरले यसअसिघ ओएसिस क्रिकेट एकेडेमी र थर्ड आईले पुष्पलाल स्पोर्ट्स क्लबलाई पराजित गरेका थिए ।

महावीरले प्रस्तुत गरेको १६२ रनको लक्ष्य पछ्याउने क्रममा थर्ड आईले २० ओभर नै ब्याटिङ गरे पनि आठ विकेट गुमाएर ९३ रन बनाउन सक्यो । थर्ड आईका निम्ति सुगम बानियाँले २३, समाज पौडेलले १४ र कृष्ण थापाले १३ रन बनाए ।

महावीरका निम्ति यकेन्द्र बुढाऐर र सोनु देवकोटाले समान दुई विकेट लिए । प्रतिश जिसीले एक विकेट लिए ।

त्यसअघि, टस जितेर ब्याटिङ रोजेको महावीरले  निर्धारित २० ओभरमा सात विकेट गुमाएर १६१ रन बनाएको थियो । महावीरका निम्ति सोनु देवकोटाले ३७ रन बनाए । मिलन थापाले ३४ र प्रतिश जिसीले अविजित २४ रन जोडे ।

थर्ड आईका निम्ति समाज पौडेलले दुई विकेट लिए । सौराज थापा र अभिषेक कार्कीले समान एक विकेट लिए ।

ओएसीसी विजयी
शनिबारै ओएसीसी क्रिकेट एकेडेमीले पुष्पलाल स्पोर्ट्स क्लबलाई ८३ रनले पराजित गरेको थियो । मूलपानीमै भएको खेलमा ओएसीसीले प्रस्तुत गरेको १६२ रनको लक्ष्य पछ्याउने क्रममा पुष्पलालले १३.४ ओभरमा सबै विकेट गुमाएर ७८ रन मात्र बनाउन सक्यो ।

ओएसीसीबाट ब्याटिङमा राजु विक र सुबोध ढुंगेलले समान ३५ रन बनाए । रोशन पुलामी मगरले ३४ रन थपे ।