काठमाडौं । प्रधानमन्त्री केपी शर्मा ओलीले ठूला दल मिलेर अर्थतन्त्रलगायत क्षेत्रमा देखिएका समस्या समाधानको प्रयास गरेको बताएका छन् । बिहीबार काठमाडौंको भृकुटीमण्डपमा नेपाल चेम्बर अफ कमर्सले आयोजना गरेको चेम्बर एक्स्पो उद्घाटन गर्दै प्रधानमन्त्री ओलीले सो दाबी गरेका हुन् । 

राजनीतिक अस्थिरताका कारण देशको अर्थतन्त्रदेखि सबै क्षेत्रमा प्रतिकूल असर परेको भन्दै उनले अहिले ठूला दल मिलेर अर्थतन्त्रलगायत क्षेत्रमा देखिएका समस्या समाधानको प्रयास गरेको बताए । अहिले अर्थतन्त्रलाई लयमा फर्काउने कोसिस भइरहेको जानकारी दिँदै उनले देशलाई २०२६ मा अर्थतन्त्रको मध्यम स्तरमा पुर्याउनका लागि सरकारको ध्यान केन्द्रित रहेको बताए । 

प्रधानमन्त्री ओलीले पूर्वाधार निर्माण गरेर मुलुकको विकास गरिने बताए । सूचना प्रविधि क्षेत्रलाई उद्योगका रूपमा विकास गरी निर्यात व्यापारका रूपमा अघि बढाउने गरी काम भइरहेको उनले जानकारी दिए । 

प्रधानमन्त्री विदेशबाट सामान ल्याएर विदेशमा नै निर्यात गर्ने कामले नक्कली आँकडा स्थापित हुन खोजेको भन्दै स्वदेशमा नै उत्पादित सामग्रीलाई निर्यात गर्न सक्नुपर्नेमा जोड दिए । विश्वमा प्रतिस्पर्धी ढंगले सूचना प्रविधिको विकास भइरहेको सन्दर्भमा नेपालमा त्यसको उचित तवरले प्रयोग गरेर फाइदा लिन सक्नुपर्ने धारणा उनले राखे । 

त्यस्तै, सञ्चार तथा सूचना प्रविधिमन्त्री पृथ्वीसुब्बा गुरुङले सूचना प्रविधि क्षेत्रलाई बलियो बनाउन पूर्वाधार गत संरचना र नीतिगत संरचना निर्माणमा मन्त्रालय लागेको बताए । पछिल्लो समय सूचना प्रविधिको विकासबाटै देशको अर्थतन्त्र सुधार गर्न सकिने आधार देखिएको भन्दै उनले यसका लागि कानुनीलगायत पूर्वाधार तयार गरिने जिकिर गरे । 

भृकुटीमण्डपमा आगामी माघ २१ गतेसम्म चल्ने चेम्बर एक्स्पोमा हस्तकलाका वस्तु, सवारीसाधन, घरजग्गा व्यवसायी, पहिरन, पाठ्यपुस्तक, सूचना प्रविधिलगायतका क्षेत्रको स्टल रहेका छन् । स्थानीय उत्पादनको प्रवद्र्धन एवं बजारीकरण तथा व्यापार अभिवृद्धि गर्ने उद्देश्यले चेम्बर एक्स्पोको आयोजना गरिएको चेम्बर अफ कमर्सले जनाएको छ । व्यापार अभिवृद्धि, स्थानीय वस्तुको बजारीकरणका लागि चेम्बरले हरेक वर्ष एक्स्पो गर्दै आएको छ ।