भक्तपुर । मध्यपुरथिमि नगरपालिका–२, सानोथिमिस्थित दिव्यश्वरी प्लानिङमा मोटरसाइकल र कार एकापसमा ठोक्किँदा एकजनाको मृत्यु भएको छ । सो दुर्घटनामा एक बालिका घाइते भएकी छन् ।

जिल्ला प्रहरी परिसर भक्तपुरका निमित्त सूचना अधिकारी एवं प्रहरी निरीक्षक टेकेन्द्र शर्मा पौडेलका अनुसार बा प्र ०१–०२७ च. ९२७ नम्बरको कार र बा५० प ७४१ नम्बरको मोटरसाइकल एकापसमा ठोक्किएको थियो ।

घटनामा मोटरसाइकलमा सवार भोजपुरको पात्लेपानी गाउँपालिका–६ घर भई हाल काठमाडौंको पेप्सीकोला बस्ने २३ वर्षीया सपना राईको मृत्यु भएको हो । उनको उपचारका क्रममा काठमाडौं मेडिकल कलेज सिनामंगलमा मृत्यु भएको हो । सो दुर्घटनामा मोटरसाइकलमै सवार तीन वर्षीया ईश्वरी राई घाइते भएकी छन् । उनीहरू आमा–छोरी हुन् ।    

कार चालक रामेछापको सुनापाती गाउँपालिका–१ घर भई हाल काठमाडौंको बूढानीलकण्ठ नगरपालिका–४ बस्ने ३४ वर्षीय कृष्णप्रसाद गौतमलाई प्रहरीवृत्त थिमिले नियन्त्रणमा लिएर अनुसन्धान गरिरहेको प्रहरी निरीक्षक पौडेलले जानकारी दिए । रासस