काठमाडौं । १५ महिनापछि इजरायल र हमासबीच युद्धविराम भएको छ । ७ अक्टोबर २०२३ मा हमासले इजरायलमा हमला गरेपछि सुरु भएको युद्ध अहिले रोकिएको छ । १९ जनवरीबाट सुरु भएको यो युद्धविराम तीन चरणमा लागु हुनेछ । युद्धविरामका क्रममा हमासको नियन्त्रणमा रहेका बन्धक रिहा हुनेछन् ।

युद्धविराम लागु भए पनि गाजाको अवस्था भने दर्दनाक छ । ७ अक्टोबर २०२३ यता ४६ हजार ७०७ जनाको इजरयाली आक्रमणमा परेर मृत्यु भएको छ । 

एक लाख १० हजारभन्दा बढी घाइते भएका छन् । इजरायल–हमास युद्धका १५ महिनामा औसतमा हरेक दिन १०० जना प्यालेस्टिनी मारिए । ११ हजार प्यालेस्टिनी बेपत्ता छन् । यो युद्धको अवधिमा कम्तीमा पनि २१७ जना पत्रकार मारिएका छन् ।

युद्ध सुरु हुनुअघि गाजाको जनसंख्या २३ लाख थियो । तर, युद्धविराम हुँदासम्म गाजाको जनसंख्या ६ प्रतिशतले घटेको छ । हजारौँ मान्छे मारिए, हजारौँ बेपत्ता छन् भने कैयौँले गाजा सहर छाडेका छन् ।

२० लाख मान्छे विस्थापित भएका छन् । हरेक १० जनामा नौजना विस्थापित भएका छन् । विद्यालय, अस्पताल, आवासीय भवन, व्यावसायिक भवन गरी गाजाका ६० प्रतिशत संरचना ध्वस्त भएका छन् ।

९२ प्रतिशत आवासीय भवन, ८८ प्रतिशत विद्यालय, ६८ प्रतिशत खेतीयोग्य जमिन, ६८ प्रतिशत सडक सञ्जाल र ५० प्रतिशत अस्पताल ध्वस्त भएका छन् ।

इजरायली गोलाबारीले ध्वस्त भएका संरचनाको भग्नावशेष हटाउन कम्तीमा पनि एक दशक लाग्ने अनुमान गरिएको अलजजिराले जनाएकाे छ ।

हमासले इजरायलमा आक्रमण गरेको केही घण्टामै इजरायलले गाजामा हवाई आक्रमण सुरु गरेको थियो । इजरायली आक्रमण कति शक्तिशाली थियो भने युद्ध सुरु भएको पहिलो महिनामै गाजाका १५ प्रतिशत संरचना ध्वस्त भएका थिए ।