काठमाडौं । सरकारले तत्काल संसद्को हिउँदे अधिवेशन नबोलाए विपक्षी दलहरूले विशेष अधिवेशनको माग गर्ने भएका छन् । बुधबार सिंहदबारमा बसेको विपक्षी ६ दलको बैठकमा यस्तो समझदारी भएको नेकपा (माओवादी केन्द्र)का उपमहासचिव वर्षमान पुनले बताए ।

“संसद्लाई छलेर काम गर्छ भने प्रतिपक्षी दलको तर्फबाट विशेष अधिवेशन गर्न माग गर्ने समझादारी बनेको छ,” उनले भने ।

सरकारले हिउँदे अधिवेशन नबोलाएर अध्यादेश ल्याएको भन्दै विपक्षीले आपत्ति जनाएका छन् ।

• विपक्षी ६ दलको निष्कर्ष– सरकारको स्वेच्छाचारी रवैया 

यस्तै, निर्वाचन कानुनमा ‘थ्रेसहोल्ड’ बढाएर साना दलको सहभागिता कमजोर बनाउन खोजिएको निष्कर्षमा विपक्षी पुगेका छन् । थ्रेसहोल्ड बढाएर दुईदलीय व्यवस्था लाद्न खोजिएको उनीहरूको आशंका छ । यसबारे केही दिनमा नै दलहरूको आधिकारिक धारणा सार्वजनिक गरिने पुनले जानकारी दिए ।