काठमाडौं । रुपन्देहीमा श्रीमतीको हत्या आरोपमा प्रहरीले एक व्यक्तिलाई पक्राउ गरेको छ । पक्राउ पर्नेमा देवदह नगरपालिका–८, टटेराका ४६ वर्षीय रुद्रबहादुर खड्का छन् ।

४० वर्षीया आफ्नी श्रीमती कमला सेन खड्काको हत्या गरेको उनीमाथि आरोप छ । शुक्रबार (हिजो) राति उनलाई पक्राउ गरिएको प्रहरी प्रधान कार्यालयले जानकारी गराएको छ ।

घरायसी विषयमा झै–झगडाका क्रममा रुद्रबहादुरले चक्कु प्रहार गर्दा कमला गम्भीर घाइते भएकी थिइन् । उक्त सूचना पाएपछि खटिएको प्रहरी टोलीले उनलाई पक्राउ गरेको हो ।

गम्भीर घाइते कमलाको उपचारका क्रममा भुलहीस्थित देवदह मेडिकल कलेजमा मृत्यु भएको प्रहरीले जनाएको छ ।