काठमाडौं । सिन्धुलीमा छोराको हत्या गरेको आरोपमा बुवा पक्राउ परेका छन् । पक्राउ पर्नेमा हरिहरपुरगढी गाउँपालिका–३ स्थित चपराडाँडाका ७६ वर्षीय डोमान सिंह सार्की छन् । उनलाई गए राति पक्राउ गरिएको प्रहरीले जनाएको छ ।

उनले आफ्नै छोरा ४९ वर्षीय लिलाबहादुर पुर्कोटी सार्कीको हत्या गरेको प्रहरीको भनाइ छ ।

प्रहरीका अनुसार, घरायसी विवादको क्रममा बुवा डोमान सिंहले गल प्रहार गर्दा छोरा लिलाबहादुर गम्भीर घाइते भएका थिए । गम्भीर घाइते भएका लिलाबहादुरको हेटौँडा अस्पतालमा उपचारको क्रममा मृत्यु भएको हो ।

घटनाको सूचना पाएलगत्तै प्रहरी चौकी हरिहरपुरगढीबाट खटिएको प्रहरीले उनलाई पक्राउ गरेको हो ।

घटनाबारे अनुसन्धान गरिरहेको प्रहरीले जनाएको छ ।