काठमाडौं । नेपाल निर्माण व्यवसायी महासंघले सरकारविरुद्ध निर्णायक आन्दोलन गर्ने तयारी गरेको छ । बिहीबार काठमाडौंमा पत्रकार सम्मेलन गरेर महासंघले निर्णायक आन्दोलनको तयारीका लागि पुस २७ गते काठमाडौंमा राष्ट्रिय भेला बोलाइएको जानकारी गराएको छ ।

भेलामा देशभरका निर्माण व्यवसायीको प्रतिनिधित्व हुने र आन्दोलनको अन्तिम खाका बनाइने महासंघले जनाएको छ । निर्माण उद्योगप्रति सरकारले उदासीनता देखाएको महासंघको भनाइ छ । अब सरकारविरुद्ध निर्णायक आन्दोलनको विकल्प नभएको महासंघका अध्यक्ष रवि सिंहले बताए ।

खस्किँदो अवस्थामा रहेको मुलुकको अर्थतन्त्र उकास्न सबैभन्दा महत्त्वपूर्ण क्षेत्र निर्माण भए पनि निर्माण क्षेत्रले नै अत्यन्तै जटिल समस्या भोगिरहेको उनको भनाइ छ ।

उनले निर्माण कार्य सम्पन्न गरेबापत निर्माण व्यवसायीले पाउनुपर्ने रकम तत्काल निकासा गर्न सरकारी निकायबाट प्रतिबद्धता आए पनि भुक्तानीको समस्या पूर्णरूपमा समाधान हुन नसकेको बताए ।

समयमै भुक्तानी नभएका कारण चालु आर्थिक वर्षमा थप निर्माण कार्य सहजरूपमा अघि बढ्न नसक्ने देखिएको महासंघले जनाएको छ ।

महासंघले निर्माण उद्योगका समस्या समाधानका लागि महासंघसमेतको प्रतिनिधित्व रहने गरी तत्काल उच्चस्तरीय आयोग गठन गर्न सरकारसंग माग गरेको छ ।