विराटनगर । कोसी प्रदेश सरकारले संकटग्रस्त सहकारीको व्यवस्थापनमा चासो दिएको छ । तिनको व्यवस्थापन गर्ने उद्देश्यले प्रदेश मन्त्रिपरिषद्ले समिति गठनको निर्णय गरेको छ ।

कोसी सरकारका प्रवक्ता एवं आन्तरिक मामिला तथा कानुनमन्त्री रेवतीरमण भण्डारीले संकटग्रस्त सहकारीको व्यवस्थापन समिति गठन र त्यसको काम, कर्तव्य तथा अधिकार टुंग्याउने गरी निर्णय गरिएको जानकारी दिए । उनले भने, “सहकारी व्यवस्थापनसहितका १० वटा निर्णय भएको छ ।”

यस्तै, खानेपानी तथा सरसफाइ सम्बन्धमा व्यवस्था गर्न बनेको विधेयक प्रदेशसभामा पेस गर्ने मन्त्रिपरिषद्ले निर्णय गरेको उनले बताए ।

पाथीभारा क्षेत्र विकास समिति, बृहत् बराह क्षेत्र विकास समिति र हलेसी महादेवस्थान विकास समिति गठन आदेश पहिलो संशोधन आदेश, २०८१ लाई स्वीकृत गर्ने र कृषि कर्जा ब्याज अनुदानसम्बन्धी कार्यविधिलाई स्वीकृत गर्ने निर्णय गरिएको उनले जानकारी दिए ।