काठमाडौं । यो साता चार दिन सेयर कारोबार भयो । पुस १० गते बुधबार सार्वजनिक बिदा परेपछि नियमित पाँच दिन कारोबार हुनुपर्नेमा चार दिन मात्र सेयर कारोबार भयो । यो साताका चारमध्ये तीन कारोबार दिनमा नेप्से परिसूचक ४७.४२ अंकले बढ्यो ।

गत साताको अन्तिम कारोबार दिन बिहीबार २५८३.२९ विन्दुमा बन्द भएको सेयर बजार यो साताको अन्तिम कारोबार दिन २६३०.७१ विन्दुमा बन्द भएको छ ।  

यो साताको पहिलो कारोबार दिन नेप्से परिसूचक १३.५३ अंकले घटेर २५८३.२९ विन्दुमा बन्द भयो । तर, तीन कारोबार दिन सोमबार, मंगलबार र बिहीबार नेप्से बढेर २६३०.७१ विन्दुमा पुग्यो । सोमबार नेप्से परिसूचक २८.९१ अंकले बढ्यो । मंगलबार १४.३१ अंकले बढ्यो भने साताको अन्तिम दिन बिहीबार ४.१९ अंकले बढेर बन्द भयो ।

पछिल्ला चार कारोबार दिनलाई हेर्दा पनि सेयर कारोबार रकम बढ्दै गएको छ । गत साताको मंगलबारदेखि पाँच अर्बभन्दा कम मूल्यको सेयर कारोबार हुँदै आएकोमा गएको मंगलबारदेखि पुनः पाँच अर्बभन्दा बढीको सेयर कारोबार हुन थालेको छ । यो साताको मंगलबार पाँच अर्ब २० करोड २२ लाख रुपैयाँको सेयर कारोबार भएकोमा यो साताको अन्तिम कारोबार दिन पाँच अर्ब ३२ करोड ९२ लाख रुपैयाँको सेयर कारोबार भएको छ ।

गत साता बजार ८५.४७ अंकले घटेको थियो । गत साता चार कारोबार दिनमा तीन दिन बजार घटेको थियो भने एक दिन बजार झिनो अंकले बढेको थियो । गत साताको मंगलबार बजार २.९५ अंकले बढेको थियो ।

गत साताको सोमबार बजार ५१.३७ अंकले घटेको थियो भने सो साताको अन्तिम कारोबार दिन बजार ३१.४३ अंकले घटेको थियो । गत साता एक दिन मात्र पाँच अर्बभन्दा बढीको सेयर कारोबार भएको थियो । तीन कारोबार दिनमा पाँच अर्बभन्दा बढीको सेयर खरिद–बिक्री भएको तथ्यांकले देखाउँछ ।

दुई साताको तथ्यांक हेर्दा बजारका सकारात्मक माहोल बनेको जस्तो देखिन्छ । किनभने कारोबार रकम, नेप्से परिसूचक र सेयर कित्ताको कारोबार पनि बढ्दै गएको छ ।

पछिल्ला दुई साताको कारोबार दिनमा एक करोड कित्ता सेयर खरिद–बिक्री हुन पनि धौ–धौ परिरहेको अवस्थामा यो साताको अन्तिम दिन दुई करोड नौ लाख ७८ हजार ९७९ कित्ता सेयर खरिद–बिक्री भएको छ । गत मंगलबार एक करोड २७ लाख ४६ हजार ४१० कित्ता सेयर खरिद–बिक्री भएको थियो । यीबाहेक पाँच कारोबार दिनमा सेयर कारोबार एक करोड कित्ता पुग्न सकेको थिएन । गत साताको सोमबार भने एक करोड २७ लाख ४५ हजार ७७७ कित्ता सेयर खरिद–बिक्री भएको थियो ।