काठमाडौं । नेपाल विज्ञान तथा प्रविधि प्रज्ञा प्रतिष्ठान (नास्ट)ले बिहीबार आफ्नो ४२औँ वार्षिकोत्सव मनाएको छ । बिहीबार खुमलटारस्थित केन्द्रीय कार्यालयमा मनाइएको वार्षिकोत्सव समारोहमा नास्टका उपकुलपति प्रा.डा. दिलीप सुब्बाले प्रतिष्ठानले अनुसन्धान र प्रर्वद्धनका क्षेत्रमा काम गर्दै आएको बताए ।

वार्षिकोत्सव कार्यक्रममा नास्टले विज्ञान तथा प्रविधिका १२ विधामा ५६ जनालाई पुरस्कृत गरेको छ ।

नास्टले ४२ वर्षमा उपलब्ध सीमित स्रोत–साधनका बाबजुद देशमा वैज्ञानिक चेतना प्रसार गर्न र देशभित्र उपलब्ध जनशक्तिलाई अनुसन्धानका लागि उत्प्रेरित गर्न काम गरिरहेको जनाएको छ ।

कार्यक्रममा शिक्षा, विज्ञान तथा प्रविधि मन्त्री एवं प्रतिष्ठानकी सहकुलपनि विद्या भट्टराईको पनि उपस्थिति थियो ।

नेपाल सरकारबाट ४२ वर्षको इतिहासमा करिब चार अर्ब ९० करोड बजेट प्राप्त गरेको नास्टले बताएको छ । उक्त बजेटबाट ३०० भन्दा बढी व्यक्तीहरूलाई पुरस्कृत गरिएको र सोही संख्यामा अनुसन्धान अनुदान पनि प्रदान गरेको नास्टको भनाइ छ ।

कार्यक्रममा राष्ट्रिय योजना आयोगका उपाध्यक्ष डा. शिवराज अधिकारी, प्रज्ञा–प्रतिष्ठानका प्राज्ञ प्रा.डा. बिनिल अर्यालको पनि उपस्थिति थियो ।