काठमाडौं । विराटनगर किंग्सका प्रशिक्षक केभिन ओ ब्रायनले तीन खेलमा जितनजिक पुगेर पनि खेल गुमाउनु परेकोले प्लेअफमा पुग्न असफल भएको बताएका छन् ।

काठमाडौं गुर्खाजसँग हार व्यहोर्दै एनपीएलको पहिलो सिजन यात्रा टुंगाएपछि प्रशिक्षक केभिनले कन्डिसनलाई राम्ररी बुझेर खेल्न नसक्दा असफल भएको बताए । उनले कठिन परिस्थितिमा सही निर्णय लिन पनि समस्या भएको उल्लेख गरे । बलिङ, ब्याटिङ र फिल्डिङमा पनि सतशप्रतिशत इफोर्ट लगाउन नसकेको उनको भनाइ छ । उनले पहिलो तीन/चार खेलमा ब्याटिङमा पनि आफ्नो टोलीले संघर्ष गर्नुपरेको उल्लेख गरे । विकेट बुझ्न विदेशी खेलाडीका लागि गाह्रो परेको उनी बताउँछन् ।

कप्तान सन्दीप लामिछानेले विकेट लिन नसक्दा पनि टोलीमाथि दबाब परेको हो भन्ने प्रश्नमा उनले एउटा बलरलाई मात्र दोष दिन नहुने र पछिल्ला खेलमा सन्दीपले पनि राम्रो गरेको उल्लेख गरे । केही खेलाडी बिरामी हुँदा समस्या परेको उनको भनाइ छ । उनले प्रतियोगिता छोटो रहेकाले फर्ममा नरहेका खेलाडीको लयमा फर्किन पनि समय लागेको बताए । सन् २०१८ मा एभरेस्ट प्रिमियर लिग खेल्न आउँदाको समयभन्दा अहिले धेरै राम्रो घरेलु खेलाडीहरू रहेको उनी बताउँछन् । उनीहरूको प्रदर्शनमा पनि धेरै विकास आएको उनको विश्वास छ ।  

काठमाडौंका कप्तान करण केसीले १२औँ ओभरभित्र खेल जित्दै प्लेअफमा पुग्न नेट रनरेटमा सुधार गर्ने लक्ष्य भए पनि सफल नभएको बताए । तर, ब्याटिङमा धराशयी हुँदा योजना सफल हुन नसकेको बताए । करणले बलिङमा राम्रो गरे पनि ब्याटिङ राम्रो हुन नसकेको बताए ।

उनले इङ्लिस ब्याटरलाई टोलीमा अनुबन्धित गर्नु खराब निर्णय नभएको पनि उल्लेख गरे । तर, पिचको कन्डिसनमा बुझ्न नसक्दा इङ्लिस ब्याटरलाई सहज नभएको उनको भनाइ छ । उनले सुरुमा कर्णाली याक्सलाई बलियो देखे पनि सुदूपश्चिमले धेरै राम्रो क्रिकेट खेलिरहेको बताएका छन् ।