काभ्रेपलाञ्चोक । प्रधानमन्त्री केपी शर्मा ओलीले शिक्षाका माध्यमबाट मुलुक आत्मनिर्भरतातर्फ अगाडि बढ्ने विश्वास व्यक्त गरेका छन् । काभ्रेपलाञ्चोकको धुलिखेलस्थित काठमाडौं विश्वविद्यालय (केयू)को ३०औँ दीक्षान्त समारोहमा शनिबार उनले रोजगारी सिर्जना गर्ने आत्मनिर्भरतामा आधारित शिक्षा दिने ढंगले सरकार अघि बढ्ने बताए ।

“अब जब दिने शिक्षा दिने हैन, जब सिर्जना गर्ने खालको शिक्षा, आत्मनिर्भर ढंगले जब दिने शिक्षातर्फ अघि बढेका छौँ । यसका निम्ति केयूलगायत विश्वविद्यालय नमुनाका रूपमा अघि बढिरहेका छन्,” केयूका कुलपति समेत रहेका ओलीले भने ।

विद्यार्थीलाई पढाइसँगै रोजागरीमा जोड्दै आत्मनिर्भर बनाउन देशका ‘नमुना’ विश्वविद्यालयसँग सहकार्य र समन्वय गर्दै जाने उनले उल्लेख गरे ।

प्रधानमन्त्री ओलीले प्रमाणपत्रले मात्र दक्ष पनि नहुने भएकाले कस्तो नागरिक हो भन्ने विषय चरित्र र नैतिकताले प्रस्ट्याउने बताए । उनले भने, “सर्टिफकेट रोजगारीको एउटा आधार हो, दक्ष नागरिक हुन आचरण, व्यवहार, म्यानर र बोलीचालीले निर्धारण गर्छ ।”

सीप र उत्तरदायित्वबाट विद्यार्थीले देश र नागरिकको पहिचान कायम राख्नुपर्ने उनले बताए । “विद्यार्थीको आचारण, नैतिकता र सोच सकारात्मक हुनुपर्छ,” उनले दीक्षित विद्यार्थीतर्फ इंगित गर्दै भने, “विद्यार्थी मृदुभाषी, नम्र, मानवतावादी, शान्तिप्रिय र म्यानरतावादी हुनुपर्छ । सफलताका लागि अझ परिष्कृति म्यानर मिसाउनुपर्छ ।”

विश्वविद्यालय शिक्षाको मन्दिर र ज्ञानको आधार हो भन्दै उनले व्यवहारतः असाधारण सीमामुक्त शिक्षालाई जीवनभर ग्रहण गरिरहनुपर्नेमा जोड दिए ।

प्रधानमन्त्री ओलीले धर्तीको २१ प्रतिशत हिमाल ‘कालापत्थर’ बन्न लागेकामा दुःखेसो पोखे । अरू भूभाग समेत मरभूमि बन्ने खतरा बढेकामा उनले चिन्ता व्यक्त गरे ।

“अरूका गल्तीले धर्तीका भूभाग मरुभूमि बन्दै छ, यसका लागि हामी वातावरणीय न्यायका लागि लडिरहेका छौँ । कालापत्थरमा परिणत हुँदै गएका हिमालको पुरानो स्वरूपमा ल्याउने विषयप्रति गम्भीर हुँदै जलवायु परिर्वतनका विषयमा पनि ध्यान दिन आवश्यक छ,” उनले भने ।

पुर्खाले वरपिपल र तुलसी धेरैभन्दा धेरै रोपेर अक्सिजनका निम्ति ‘ब्यालेन्स’ मिलाएको उनले बताए । पारिस्थितिकी चक्रलाई नबिगार्न त्यसो गरिएकाले ‘क्लाइमेट मेन्टेन’ हुनुपर्छ भन्ने विषयमा आफूले जोड दिँदै आएको उनले उल्लेख गरे ।

समारोहमा शिक्षा, विज्ञान तथा प्रविधिमन्त्री एवं केयूका सहकुलपति विद्या भट्टराईको पनि उपस्थिति थियो । विश्वविद्यालयका विभिन्न संकायका शनिबार एक हजार २६५ जना विद्यार्थी दीक्षित भएका छन् । रासस