काठमाडौं । नेपाल प्रिमियर लिग (एनपीएल)मा विराटनगर किंग्सले शुक्रबार दोस्रो जित निकाल्दा नायक बने, बसिर अहमेद ।

कीर्तिपुरस्थित त्रिवि क्रिकेट मैदानमा भएको खेलमा विराटनगरले चितवन राइनोजविरुद्ध ५१ रनको सहज जित निकाल्दा बसिरले बलिङ र ब्याटिङमा उस्तै सानदार प्रदर्शन गरे ।

टस जितेर ब्याटिङमा आउने निर्णय गरेको विराटनगरले स्कोरबोर्डमा १० रन जोड्दै शीर्षक्रमका तीन ब्याटरलाई गुमाइसकेको थियो । दोस्रो ओभरमै तीन ब्याटर गुमाउँदा कप्तान सन्दीप लामिछानेको ब्याटिङ गर्ने निर्णय गलत रहेजस्तो देखिन्थ्यो । विराटनगरले चौथो विकेटका रूपमा निकोलस किर्टोनलाई पनि स्कोरबोर्डमा ३३ रन हुँदा गुमायो ।

यसपछि ब्याटिङका निम्ति क्रिजमा ओर्लिए– बसिर अहमेद । ६.३ ओभरमा ब्याटिङमा ओर्लिएका बसिर पहिलो इनिङको अन्तिम बलसम्मै अविजित रहे ।

यसक्रममा उनले ४४ बल खेल्दा ६८ रन अर्धशतकीय इनिङ खेले । जसमा समान चार चौका र छक्का समावेश छन् । ३३–४ को स्थितिबाट बसिरले पाँचौँ विकेटका निम्ति मार्टिन गप्टिलसँग ६५ रनको साझेदारी गर्दै विराटनगरको मध्यक्रम सम्हाले । बसिरलाई बलियो साथ दिएका गप्टिल अर्धशतकबाट पाँच रनले चुके । उनले ३५ बलमा एक चौका र चार छक्का प्रहार गरे ।

प्रतियोगितामा पहिलोपटक अर्धशतकीय इनिङ खेलेका बसिरले ३९ बलमा ५० रन पूरा गरेका थिए । जतिबेला उनले चार चौका र दुई छक्का प्रहार गरेका थिए ।

त्यसो त बसिरलाई पभेलियन फर्काउन चितवनले अवसर नपाएको भने हैन । खेलको ८.५ ओभरमा चितवनबाट खेलिरहेका पाकिस्तानी बलर सोहेल तान्विरले बसिरको सहज क्याच ‘मिस’ गरेका थिए । उक्त ओभरमा क्याच छुट्दा बसिर नौ रनमा खेलिरहेका थिए ।

“क्याच छुटेपछि आज लामो इनिङ खेल्छु भन्ने लागिरहेको थियो । एकदमै खुसी लागिरहेको छ । थ्यांक्स टू अल्लाह,” खेलपछि बसिरले क्याच छुटेको र आफ्नो प्रदर्शनबारे भने ।

ब्याटिङमा अर्धशतक बनाएका बसिरले बलिङमा पनि उस्तै प्रभावशाली प्रदर्शन गरे । चार ओभर बलिङ गर्दा बसिरले चितवनका ओपनर हसन एसाखिललाई पभेलियनको दिशा देखाए । उनले आफ्नो स्पेनलमा किफायती बलिङ गर्दै १९ रन खर्चिदा एक मेडन समेत फ्याके । जुन खेलभर कुनै पनि बलरले फ्याकेको एक मात्र मेडन ओभर समेत थियो ।

अविजित ६८ रनसँगै ४–१–१९–१ (ओभर, मेडन, रन र विकेट) बलिङ प्रदर्शन गरेका बसिर खेलको ‘प्लेयर अफ दी म्याच’ समेत चुनिए ।

खेलपछि पत्रकारबाट प्रश्न आयो– आजको यो प्रदर्शनलाई तपाईंको हालसम्मकै बेस्ट भन्न मिल्छ ? यसमा बसिर केही सेकेन्ड सोचमग्न जस्तो देखिन्थे । त्यसपछि छोटो–सरल जवाफ फर्काए ।

“यो ठूलो गेम हो भन्न मिल्छ,” जवाफमा बसिरले भने । बसिरको यो प्रतिक्रियापछि ‘पोस्ट म्याच प्रेस मिट’ मा उपस्थित सबै पत्रकारमा हाँसोको फोहरा छुट्यो । बसिर आफैँले पनि हाँसो रोक्न सकेनन् ।

अझै कठिन स्थितिमा विराटनगर
जितका बाबजुद विराटनगरको प्लेअफमा पुग्ने सम्भावना भने निक्कै झिनो छ । ६ खेलबाट चार अंक जोडेको विराटनगर तालिकाको पाँचौँ स्थानमा छ । विराटनगरले अब लिग चरणको अन्तिम खेलमा आइतबार काठमाडौं गुर्खाजविरुद्ध खेल्ने तालिका छ । प्लेअफ सम्भावनालाई जिवित राख्न विराटनगर यो खेलमा जित्नै पर्ने दबाबमा हुनेछ ।

विराटनगरलाई आफ्नो जितमात्रै पर्याप्त भने छैन । सन्दीप लामिछानेको कप्तानीमा रहेको यो टोलीले अरु खेलको नतिजा पनि कुर्नुपर्ने हुन्छ ।

यही समीकरण लक्षित प्रश्न बसिरलाई यसरी आयो– लिग चरणको अन्तिम खेलमा काठमाडौंविरुद्ध खेल्दै हुनुहुन्छ । प्लेअफ पुग्ने कुरामा कत्तिको विश्वस्त हुनुहुन्छ ?

जवाफमा बसिरले भने, “त्यही हो, अन्तिम खेल जतिसक्दो राम्रोसँग जित्ने । राम्रो रनरेटले ।”