साओ पाउलो । सिरियाली राष्ट्रपति बसर अल–असदको निष्कासनको नेतृत्व गर्ने इस्लामिक समूह हयात ताहरिर अल–साम (एचटिएस) र सिरियाका अन्य समूहहरूसँग कतारी अधिकारीहरू सम्पर्कमा रहेको एक अधिकारीले जानकारी दिएका छन् ।

“कतारीहरूले एचटिएससँग सञ्चारको पहिलो च्यानल स्थापना गरेका छन् । एचटिएस र कतारी कूटनीतिज्ञहरूसँगको सञ्चार आगामी २४ घन्टामा अल बसिरसँग जारी रहने अपेक्षा गरिएको छ,” वरिष्ठ विद्रोही मोहम्मद बसिरलाई उद्धृत गर्दै नाम नछाप्ने सर्तमा अधिकारीले भने ।

असदको सरकारले सन् २०११ मा शान्तिपूर्ण विद्रोहलाई दमन गरेपछि कतार सशस्त्र विद्रोहको मुख्य समर्थक र पदच्युत नेताको कडा आलोचक रहँदै आएको थियो ।

सन् २००० देखि सत्तामा रहेका असद एचटिएस र यसका सहयोगीहरूको द्रुत अभियानपछि गत साता पदच्युत भएका थिए । 

कतारी विदेश मन्त्रालयका प्रवक्ता माजेद अल–अन्सारीले आफ्नो देशले एचटिएससँग विशेष कुरा गरिरहेको छ कि छैन भनेर भन्न अस्वीकार गर्दै यसअघि कतार ‘हामी सिरियाली मोजाइकभित्र सधैँ सम्पर्कमा रहेका सबै समूहहरूसँग सम्पर्कमा रहेको’ बताएका थिए । 

प्रवक्ताले असद विरुद्धको विद्रोहको समयमा विपक्षी समूहहरूका लागि खोलिएको कतारको सिरियाली दूतावास अब ‘सिरियामा नयाँ वास्तविकताको पहिलो दूतावास’ भएको पनि बताए । “म यस समयमा भइरहेको विशेष कल वा बैठकहरूमा विशेष टिप्पणी गर्न सक्दिनँ, तर म तपाईंलाई भन्न सक्छु कि हाम्रो ढोका खुला छ, हामी सबैसँग कुरा गरिरहेका छौँ,” उनले भने । 

असदलाई अपदस्थ गर्नुअघि कतारले शनिबार सिरियामा रुसी, इरानी, टर्की र अरब अधिकारीहरूसँग बैठकहरू आयोजना गरेको थियो ।