काठमाडौं । नेपाल प्रिमियर लिग (एनपीएल)मा लुम्बिनी लायन्ससँग पराजित भएपछि चितवन राइनोजका प्रशिक्षक उमेश पटवालले आफ्नो टिमका लागि खराब दिन भएको बताएका छन् ।

मंगलबार कीर्तिपुरस्थित त्रिवि क्रिकेट मैदानमा भएको दिनको पहिलो खेलमा लुम्बिनीले चितवनविरुद्ध ३३ रनको जित निकालेको थियो । खेलमा लुम्बिनीले दिएको १६८ रनको लक्ष्य पछ्याउने क्रममा चितवनले निर्धारित २० ओभर ब्याटिङ गरे पनि आठ विकेट गुमाएर १३४ रनमात्रै बनाएको थियो ।

प्रतियोगितामा व्यहोरेको दोस्रो हारपछि चितवनका प्रशिक्षक पटवालले टोलीका निम्ति आज कठिन दिन भएको प्रतिक्रिया दिएका हुन् । उनले लुम्बिनीका कप्तान रोहितकुमार पौडेल र साद बिन जफरले उत्कृष्ट प्रदर्शन गर्दा आफ्नो टिमले हार व्यहोर्नुपरेको समेत बताए ।

“रोहित र सादले हामीबाट खेल लगेजस्तो लाग्छ । हामीले टिमका सबैका निम्ति योजना बनाएका थियौँ । तर, कुनै दिन यसले काम गर्छ । कुनै दिन काम गर्दैन । आज  हाम्रा लागिखराब दिन थियो,” पटवालले भने, “कुशलले आज राम्रो बलिङ गरे । पहिलोपटक कप्तानी पाएका कुशलले यो जिम्मेवारीलाई पनि राम्रोसँग निभाइरहेका छन् । आज  हाम्रा लागि कठिन दिन थियो । अब आगामी खेलका निम्ति राम्रो योजना बनाउन आवश्यक छ ।”

लुम्बिनीसँगको हारका बाबजुद चितवन तालिकाको तेस्रो स्थानमा यथावत् छ । चितवनले पाँच खेलबाट ६ अंक जोडेको छ । प्रतियोगितामा पहिलो जित निकालेको लुम्बिनी भने पाँच खेलबाट दुई अंकसहित तालिकाको पुछारमा छ ।