काठमाडौं । नेपाली कांग्रेसका महामन्त्री गगनकुमार थापाले विदेशी कम्पनीहरू नेपालमा लगानी गर्न डराइरहेको बताएका छन् । लगानी गरेर कमाएको मुनाफा सरकारले बाहिर लैजान नदिँदा विदेशी कम्पनीहरू डराइरहेको उनले उल्लेख गरे ।

मानवअधिकार तथा शान्ति समाजले मंगलबार काठमाडौंमा आयोजना गरेको नागरिक संवाद कार्यक्रममा उनले सरकारले विदेशी लगानीकर्तालाई नेपालमा लगानी गर्ने वातावरण अझै बनाउन नसकेको बताए । “नेपालमा अहिले लगानी गरेर मुनाफा कमाएर बाहिर लग्न खोज्ने तीन कम्पनीहरूलाई सरकारले अवरोध सिर्जना गर्दा उनीहरू र अन्य कम्पनीहरू पनि  नेपलामा लगानी गर्न डराइरहेका छन्,” उनले भने, “ती कम्पनीहरूको नाम लिन म पनि डराइरहेको छु । हामीलाई फाइदा चाहिएको छ, तर हामीले वातावरण बनाउन सकिरहेका छैनौँ ।”

रोजगारी दिने काम सरकारको नभई निजी क्षेत्रको भएको उनको भनाइ छ । त्यसका निम्ति सरकारले सहज वातावरण सिर्जना गरिदिनुपर्नेमा उनले जोड दिए । नेपालमा एक आर्थिक वर्षमा पाँच लाख मानिसलाई रोजगारी दिन सक्ने गरी निजी क्षेत्रलाई चलायमान बनाउनुपर्ने उनले बताए ।

“...रोजगारी सिर्जना सरकारले गर्न सक्दैन । रोजगारी सिर्जना गर्ने काम निजी क्षेत्रको हो । तर, सरकारले त्यसको लागि वातावरण बनाइदिनुपर्छ,” उनले भने ।

सूचना प्रविधिको क्षेत्रमा काम गरिरहेका कम्पनीका निम्ति बाहिर लगानी गर्न नेपाल राष्ट्र बैंकले बाटो खोलिदिनुपर्ने उनले बताए । 

विश्वभर आर्थिक आय बढ्दा पनि जनसंख्या घट्दै गएको भन्दै उनले अबको २० वर्षपछि नेपाल जापान र कोरियाजस्तै राष्ट्र बन्ने बताए । न्युज एजेन्सी नेपाल