काठमाडौं । आन्तरिक राजस्व विभागले नक्कली तथा झुटो कारोबार गर्ने करदातालाई नियन्त्रण गर्न जोड दिने भएको छ । भन्सार विभाग र राजस्व अनुसन्धान विभागबीच भएको छलफलमा राजस्व चुहावट तथा कर छलीसँग सम्बन्धित विषयमा छलफल भएको हो ।

तीन विभागबीच राजस्व चुहावटका जोखिमका क्षेत्र, वस्तु, नाका र समूहहरू पहिचान गर्ने, सूचना संकलन गर्ने, विश्लेषण गर्ने तथा सोको कार्यान्वयनका लागि एक–आपसमा सूचना आदान प्रदान गर्ने विषयमा छलफल भएको छ ।

राजस्व अनुसन्धान विभागको भीसीटीएस प्रणाली, भंसार विभागको आसिकुडा वर्ल्ड प्रणाली र आन्तरिक राजस्व विभागको एकीकृत सूचना प्रणालीमा प्रविष्ट भएका सूचनालाई एक आपसमा अन्तर आवद्धता कायम गरी कर परीक्षण तथा अनुसन्धान, भंसार जाँचपासपछिको परीक्षण, बजार अनुगमन, गस्ती परिचालन आदिमा प्रयोग भएको छ ।

तीनवटै विभागबाट सूचनाका आधारमा प्रदर्शनीय प्रभाव पर्ने गरी संयुक्त गस्ती परिचालन गर्ने र कर छली गर्ने करदातालाई कारबाहीको दायरामा ल्याउने सहमति भएको छ । शंकास्पद कारोबार र अनधिकृत गोदामहरूको विशेष निगरानी गर्ने जनाइएको छ ।

कर छली गर्ने मनसायले व्यक्तिगत खाताबाट व्यावसायिक कारोबार गर्ने प्रवृतिलाई रोक्न अन्तर निकाय सूचना आदानप्रदान गर्ने र शंकास्पद कारोबारको निगरानी तथा अनुगमन गरी कारबाहीको दायरामा विभागले ल्याउने भएको छ ।