काठमाडौं । देशका केही स्थानमा यो वर्षको हिउँदको पहिलो वर्षा भएको छ । पश्चिमी वायुको प्रणालीको प्रभावले वर्षासँगै केही स्थानमा हिमपात समेत भएको मौसम पूर्वानुमान महाशाखाले जनाएको छ ।

पछिल्लो १२ घण्टा (सोमबार बिहान साढे ९ बजेसम्म)मा कैलालीमा सबैभन्दा बढी ११.६ मिलिमिटर वर्षा मापन गरिएको छ । त्यसपछि हुम्लामा ६.५ मिलिमिटर वर्षा भएको महाशाखाका मौसमविद् राजु प्रधानांगले जानकारी दिए ।

उनका अनुसार, यो अवधिमा बाजुरामा ६.२, अछाममा ४.६ मिलिमिटर वर्षा मापन गरिएको छ । यस्तै, डोटी, बैतडी, कञ्चनपुर, डडेलधुरामा वर्षा भएको उनले जानकारी दिए ।

यी केही जिल्लामा आज थप वर्षाको सम्भावना रहेको उनले बताए । “विशेष गरी सुदूरपश्चिम र कर्णाली प्रदेशमा वर्षाको सम्भावना छ,” उनले बाह्रखरीसित भने ।

सुदूरपश्चिम र कर्णाली प्रदेशका हिमाली तथा उच्च पहाडी भूभागमा हिमपात समेत भएको महाशाखाले जनाएको छ ।

उक्त प्रणाली पश्चिम हुँदै पूर्वतिर सर्नेछ । त्यसको प्रभावले देशभरि नै बदली (आकाशमा बादल) र वर्षा/हिमपातको सम्भावना रहेको उनले बताए । काठमाडौंमा वर्षाको सम्भावना न्यून रहेको उनले जानकारी दिए । “काठमाडौंमा वर्षाको सम्भावना खासै देखिँदैन । भइहाले पनि फाट्टफुट्ट मात्र हुन्छ,” उनले भने ।

महाशाखाले यसअघि नै आइतबार (हिजो) राति र आज देशका केही स्थानमा वर्षा र हिमपात हुने जनाएको थियो । मंगलबार (भोलि)देखि मौसम सफा हुने मौसमविद्ले बताएका छन् ।