काठमाडौं । डोनाल्ड ट्रम्प निर्वाचित भएको अमेरिकी राष्ट्रपति चुनावको रोचक तथ्य सार्वजनिक भएको छ । एपी न्युजले एक लाख २० हजार मतदातामा गरेको सर्वेक्षणले बिरालो पाल्ने महिला मतदातादले डेमोक्रेटिक उमेदवार कमला ह्यारिसलाई भोट हाले भने कुकुर पाल्नेले डोनाल्ड ट्रम्पलाई भोट हालेको देखाएको छ ।

बिरालो पाल्ने पुरुष मतदताले पनि ट्रम्पलाई नै भोट हालेको एपीको सर्वेक्षणले देखाएको छ । एपीको सर्वेक्षणका अनुसार, बिरालो पाल्ने महिलाहरूमध्ये ५९ प्रतिशतले कमला ह्यारिसलाई भोट हाले । चालिस प्रतिशतले डोनाल्ड ट्रम्पलाई हाले ।

सर्वेक्षणमा सहभागी कुकुर पाल्ने ४७ प्रतिशत महिला मतदातादले ह्यारिसलाई भोट हाले भने ५२ प्रतिशतले ट्रम्पलाई । कुकुर र बिरालो दुवै पाल्ने महिला मतदातामध्ये ४७ प्रतिशतले ह्यारिसलाई भोट हाले भने ५२ प्रतिशतले ट्रम्पलाई ।

त्यसैगरी, बिरालो पाल्ने पुरुष मतदातामध्ये ४६ प्रतिशतले ह्यारिसलाई मतदान गरे भने ५१ प्रतिशतले ट्रम्पलाई । कुकुर पाल्ने पुरुष मतदाता मध्ये ४० प्रतिशतले मात्र ह्यारिसलाई भोट हाले भने ५९ प्रतिशतले ट्रम्पलाई भोट हाले । कुकुर र बिरालो दुवै पाल्ने पुरुष मतदातामध्ये ४३ प्रतिशतले ह्यारिसलाई भोट हाले भने ५६ प्रतिशतले ट्रम्पलाई भोट हाले ।

ट्रम्पले चुनावी अभियानका क्रममा ओहायोमा आप्रवासीहरूले कुकुर र बिरालाहरू चोरेर खाने गरेको दाबी गरेका थिए । रोचक त के छ भने ट्रम्प र ह्यारिसले कुकुर/बिरालो पालेका छैनन् ।

एपीबाट ।