तेहरान । इरानले शुक्रबार आफ्नो सबैभन्दा भारी अन्तरिक्ष ‘पेलोड’ (एक उपग्रह र एउटा अन्तरिक्षयान)लाई स्वदेशमा विकसित रकेटको प्रयोग गरी सफलतापूर्वक प्रक्षेपण गरेको छ ।

सरकारी टेलिभिजनका अनुसार, ३०० किलोग्राम तौल भएको उक्त पेलोडमा फखर–१ दूरसञ्चार उपग्रह र समन–१ अन्तरिक्षयान छ ।

इरान अन्तरिक्ष अनुसन्धान केन्द्रले सन् २०१७ मा सार्वजनिक गरेको समन–१ एक ‘कक्षीय प्रसारण प्रणाली’ हो, तल्लो कक्षबाट माथिल्लोमा उपग्रहहरू पुर्‍याउन यो डिजाइन गरिएको हो ।

“यो प्रक्षेपण उपग्रहलाई उच्च कक्षमा स्थानान्तरण गर्ने दिशामा महत्त्वपूर्ण कदम हो,” टीभी रिपोर्टमा भनिएको छ ।

यो प्रणाली पहिलोपटक सन् २०१७ को फेब्रुअरीमा इरानका तत्कालीन राष्ट्रपति हसन रुहानीको उपस्थितिमा सुरु गरिएको थियो । र, सन् २०२२ मा परीक्षण सुरु गरिएको थियो ।

पेलोडहरू सेम्नान प्रान्तको इमाम खोमेनी प्रक्षेपण आधारबाट घरेलु सिमोर्ग उपग्रहवाहक प्रयोग गरेर प्रक्षेपण गरिएको हो । एक पौराणिक इरानी चराको नामबाट नामकरण गरिएको सिमोर्ग इरानको रक्षा मन्त्रालयले विकास गरेको तरल–इन्धन उपग्रह प्रक्षेपणवाहन हो ।

गएको सेप्टेम्बरमा इरानले रिभोल्युसनरी गार्ड्सको एयरोस्पेस डिभिजनले उत्पादन गरेको गायम यानको प्रयोग गरेर चाम्रान–१ अनुसन्धान उपग्रहलाई सफलतापूर्वक कक्षमा स्थापित गरेको जनाएको थियो ।

गएको महिना रुसले इरानले निर्माण गरेका दुई उपग्रह कोस्वार र होधोदसहित ५५ भूउपग्रह प्रक्षेपण गरेको थियो । रासस/एएफपी