काठमाडौं । यू–१९ एसिया कप क्रिकेट प्रतियोगितामा नेपाल श्रीलंकासँग पराजित भएको छ ।

संयुक्त अरब इमिरेट्स (यूएई)को सारजाह क्रिकेट स्टेडियममा शुक्रबार भएको आफ्नो पहिलो खेलमा नेपाल श्रीलंकासँग ५५ रनले पराजित भएको हो । श्रीलंकाले दिएको २३४ रनको लक्ष्य पछ्याएको नेपाल ४६.२ ओभरमा सबै विकेट गुमाउँदै १७८ रनमा समेटियो । नेपालका लागि ओपनर मयन यादवले सर्वाधिक ६२ रनको योगदान दिए । उनले ९१ बलमा तीन चौका र दुई छक्काको सहयोगमा ६२ रन बनाएका हुन् ।

त्यस्तै, नेपालका अर्का ओपनर आकाश त्रिपाठीले १९, उत्तम थापाले १७, अर्जुन कुमाल र नरेन भट्टले समान १२–१२ तथा नरेन साउदले १६ रन जोडे । श्रीलंकाका लागि प्रभिन महेशले तीन विकेट लिए भने न्युटान रन्जितकुमार, मथुलन कुगाथस र भिहास थिवमिकाले समान दुई/दुई विकेट लिए । त्यस्तै, वीरन चामुदिथले एक विकेट झारे ।

त्यसअघि टस हारेर पहिला ब्याटिङको निम्तो पाएको श्रीलंकाले ५० ओभरको अन्तिम बलमा सबै विकेट गुमाउँदै २३३ रन बनाउको थियो । श्रीलंकाका लागि शरुकजन शन्मुगनाथले ९९ बलमा सर्वाधिक ६२ रन जोडे ।

त्यसैगरी लक्भीन अबेसिंगा ५० बलमा ५३ रन जोडे भने कभिजा गिमामगेले ४३ बलमा ३७ रन बनाउँदै रन आउट भए । दुलनिथ सिंगारा र भिमथ दिनसाराले समान २४–२४ रन जोडे । नेपालका लागि सन्तोष यादवले चार विकेट लिए भने युवराज खत्रीले दुई विकेट लिए । कप्तान हेमन्त धामी र नरेन साउदले समान १–१ विकेट लिए । एसिया कपमा नेपालले यही मंसिर १६ गते आफ्नो दोस्रो खेल बंगलादेशसँग खेल्नेछ । रासस