काठमाडौं । हंगेरीविरुद्ध ४–० को सहज जित निकाल्दै नेदरल्यान्ड्सले यूईएफए लिग अफ नेसन्सको क्वार्टरफाइनलमा स्थान पक्का गरेको छ ।

शनिबार राति भएको खेलमा डच टिमलाई जित दिलाउन वाउट वेघरोस्ट, कोडी गाक्पो, डेन्जेल डम्फ्रिज र टाउन कुपमेनर्सले गोल गरे ।

नेदरल्यान्ड्सले पहिलो हाफमा दुई र दोस्रो हाफमा दुई गोल गरेको हो । खेलको २१औँ मिनेटमा वेघरोस्टले पेनाल्टीमार्फत गरेको गोलमा नेदरल्यान्ड्सले अग्रता बनाएको थियो । पहिलो हाफको इन्जुरी समयमा गाक्पोले पेनाल्टीमार्फत नै घरेलु टिमको अग्रता दोब्बर बनाए ।

६४औँ मिनेटमा डफ्रिजले टिमका लागि तेस्रो गोल गरे । यस्तै, खेलको निर्धारित समय सकिन चार मिनेट बाँकी रहँदा कुपमेनर्सले गोल गरेपछि नेदरल्यान्ड्सले सहज जित निश्चित गरेको हो ।

जितसँगै क्वार्टरफाइनल यात्रा तय गरेको नेदरल्यान्ड्सले लिग ‘ए’ समूह ३ मा आठ अंक जोडेको छ । तालिकाको दोस्रो स्थानमा रहेको नेदरल्यान्ड्सले पाँच खेल खेलेको छ । समान खेलबाट पाँच अंक जोडेको हंगेरी तालिकाको तेस्रो स्थानमा छ ।