भक्तपुर । भक्तपुरमा ट्रयाक्टर दुर्घटना हुँदा एकजनाको मृत्यु भएको छ । पाँचजना घाइते छन् ।

ट्रयाक्टरमा सवार चाँगुनारायण नगरपालिका–५ निवासी ४५ वर्षीय हरिगोविन्द सुवालको उपचारका क्रममा शनिबार मृत्यु भएको जिल्ला प्रहरी कार्यालय भक्तपुरका प्रहरी नायब उपरीक्षक ढुण्डीराज न्यौपानेले जानकारी दिए ।

चाँगुनारायणबाट भक्तपुरको डेकोचातर्फ आउँदै गरेको ना२त ९३४० नम्बरको ट्रयाक्टर अनियन्त्रण भएर सडकबाट तल पल्टिएको थियो ।

दुर्घटनामा घाइते भएका ट्रयाक्टरमा सवार चाँगुनारायण–५ निवासी ३५ वर्षीया राधिका अवाल, ६० वर्षीय गोपाल कोजु, ४४ वर्षीय राधेश्याम सितिखु र ७४ वर्षीय पूर्णकेसी शिल्पकार भक्तपुर अस्पतालमा सामान्य उपचारपछि घर फर्किएका उनले जानकारी दिए ।

चालक भक्तपुर नगरपालिका–२, व्यासीका ४८ वर्षीय गणेश सुवालको भने भक्तपुर अस्पतालमा उपचार भइरहेको उनले बताए । रासस