मनिला । फिलिपिन्सले उसागी नाम दिइएको विनाशकारी आँधीको चेतावनीपछि बिहीबार प्रभावित क्षेत्रका हजारौं मानिसलाई खाली र सुरक्षित क्षेत्रमा सारेको छ । आँधीको प्रभाव यसपहिले नै अर्को आँधीबाट प्रभावित उत्तरतर्फ अघि बढ्दै गएपछि चेतावनी जारी गरिएको हो ।

प्रतिघण्टा १८५ किलोमिटरसम्मको निरन्तर हावासँगै उसागी आँधी लुजनको मुख्य टापुमा अवतरण गर्ने सम्भावना रहेको जनाइएको छ । विनाशकारी मौसमी लहरले यसअघि नै  १५९ जनाको ज्यान लिएको छ ।

राष्ट्रसंघलाई प्रभावित क्षेत्रका निम्ति तीन करोड २० लाख ९० हजार अमेरिकी डलर सहयोगको प्रस्ताव अन्तर्राष्ट्रिय समुदायसँग गरिएको छ । राष्ट्रिय मौसम विभागका अनुसार, आँधीले हल्का सामग्रीको संरचनामा लगभग पूर्ण क्षति पुर्‍याउन सक्छ ।

भारी वर्षा र तीन मिटरसम्मको सम्भावित कडा छालको पूर्वानुमान गरी आँधीको चेतावनी उच्च चरणमा लागु गरिएको छ ।

कागायन प्रान्तमा आँधी अवतरण गर्ने अपेक्षा गरिएकाले स्थानीय बासिन्दालाई सुरक्षित स्थानमा सारिएको अधिकारीहरूले जनाएका छन् । कागायनका नागरिक सुरक्षा प्रमुख रुएली राप्सिङले स्थानीय सरकारहरूले ४० हजार मानिसलाई आश्रयमा लैजाने बताएका छन् ।

उसागीपछि उष्णकटिबन्धीय आँधी म्यान–यीले पनि यस सप्ताहन्तमा राजधानी मनिला वरपर फिलिपिन्सको जनसंख्याको केन्द्रमा प्रहार गर्ने पूर्वानुमान छ ।

आँधीहरू आउने क्रम जारी रहेको बताउँदै समुदायले आघातबाट निको हुने प्रयास गरेसँगै अर्को उष्णकटिबन्धीय आँधीले फिलिपिन्सलाई फेरि प्रभावित गरिरहेको संयुक्त राष्ट्रसंघ फिलिपिन्सका मानवीय संयोजक गुस्ताभो गोन्जालेजले बताएका छन् ।

हालैको एक अध्ययनले एसिया–प्रशान्त क्षेत्रमा जलवायु परिवर्तनका कारण आँधीबेहरीको असर तटीयरेखामा तीव्र र लामो समयसम्म रहने गरेको देखाएको छ । रासस/एएफपी