काठमाडौं । साहित्यकार दाजु गुरुङको उपन्यास ‘निरजोया’को विमोचनसँगै पुस्तकमाथि विमर्श सम्पन्न भएको छ । बुधबार काठमाडौंमा सभ्यता अन्वेषण केन्द्रद्वारा आयोजित कार्यक्रममा प्रमुख अतिथि प्रा. डा. गोविन्दराज भट्टराई लगायतका पाहुनाहरूले कृति सार्वजनिक गरे । 

कार्यक्रममा डा. भट्टराईले नेपाली डायास्पोरिक लेखनमा स्थापित साहित्यकार गुरुङले मलेसिया र हङकङको नेपाली डायास्पोरिक समाजको गहिरो अध्ययन गर्दै उपन्यास ‘निरजोया’ लेखेको आफूलाई लागेको बताए । उनले गुरुङको यसअघिका कथाकृति ‘टाँकीका फूलहरू’ र ‘लाई–सी’ पठनीय कृति भएको बताए । 

कार्यक्रममा कवि श्रवण मुकारुङले गुरुङको ‘निरजोया’ उपन्यासले पाठकलाई गहिरो प्रभाव पार्ने उल्लेख गरे । डा. अशोक थापाले ‘निरजोया’माथि समाजशास्त्रीय दृष्टिकोणबाट हेर्दा मानिसमा माया–प्रेम, स्नेह, सद्भाव र नैतिकता भन्ने कुरा संकटमा पर्दै गइरहेको विषय गम्भीर रूपमा उठाएको विचार व्यक्त गरे । 

राजकुमार बानियाँले गुरुङमा विषयवस्तुको खोज, पात्रहरूको चयन र लेखनशैली मौलिक रहेको बताए ।