काठमाडौं । पछिल्लो तथ्यांक अनुसार, १४ कम्पनीले कात्तिक २० गतेदेखि पुस ४ गतेसम्म साधारण सभा गर्दै छन् । यी कम्पनीमध्ये आठ कम्पनीले मंसिर ४ गतेसम्म नगद तथा बोनस सेयर वितरण गर्ने प्रस्ताव पारित गर्ने छन् ।

कम्पनी रजिस्ट्रारको कार्यालयमा दर्ता भएका कम्पनीले पुस मसान्तसम्म आफ्नो साधारण सभा सम्पन्न गर्नुपर्ने प्रावधान छ । कम्पनीहरूले साउनदेखि नै साधारण सभा गर्दै आएका छन् ।

तर, धितोपत्र दोस्रो बजारमा सूचीकृत कम्पनीहरूमध्ये तिहार अगाडिसम्म १४ कम्पनीले पुस ४ गतेसम्म साधारण सभा गर्ने मिति सार्वजनिक गरेका छन् । साधारण सभा गर्ने तयारीमा रहेका यी १४ कम्पनीमध्ये ६ वटाले लगानीकर्तालाई लाभांश प्रस्ताव गरेका छैनन् ।

तर, यी कम्पनीले आफ्नो वित्तीय विवरणमाथि छलफल गरेर पारित गर्नुका साथै लेखापरीक्षक नियुक्ति गर्ने प्रस्ताव गरेका छन् ।

यसरी लाभांश प्रस्ताव नगर्नेमा माइखोला हाइड्रोपावर, नेपाल रिपब्लिका मिडिया, रिडी पावर कम्पनी, समृद्धि फाइनान्स र श्वेत–गंगा हाइड्रोपावर एन्ड कन्स्ट्रक्सन कम्पनी छन् । सीईडीबी हाइड्रोपावर डेभलपमेन्ट कम्पनीले भने विशेष साधारण सभा आयोजना गरेको छ । यो कम्पनीले आफ्नो प्रस्तावमा सञ्चालक नियुक्ति गर्ने भनेको छ ।

साधारण सभा आयोजना गरेका १४ कम्पनीमध्ये हाथवे इन्भेस्टमेन्ट नेपालले १० प्रतिशत बोनस सेयर र कर प्रयोजनका लागि ०.५२६ प्रतिशत नगद लाभांश गरी कुल १०.५२६ प्रतिशत सेयरधनीलाई दिने प्रस्ताव गरेको छ । यस कम्पनीले उक्त लाभांश पारित गर्न कात्तिक २५ गते साधारण सभा गर्ने जानकारी दिएको छ । कम्पनीले साधारण सभा प्रयोजनका लागि कात्तिक ७ गते बुक क्लोज गरिसकेको छ । यही आधारमा कात्तिक ६ गतेसम्म कायम सेयरधनीले कम्पनीको बोनस सेयर प्राप्त गर्ने छन् ।

स्वावलम्बन लघुवित्त वित्तीय संस्थाले १४.७५ प्रतिशत लाभांश पारित गर्न कात्तिक ३० गते साधारण सभा आयोजना गरेको छ । उक्त दिन सम्पन्न हुने साधारण सभाले पारित गरेपछि सेयरधनीले कम्पनीको लाभांश प्राप्त गर्ने छन् । तर, यस कम्पनीको सेयर कात्तिक ८ गतेसम्म खरिद गरेको हुनुपर्ने छ । किनभने कम्पनीले कात्तिक ९ गते एक दिन सेयरधनी दर्ता किताब बन्द (बुक क्लोज) गरेको थियो ।

सानिमा बैंकले प्रस्तावित ५.२६३ प्रतिशत नगद लाभांश पारित गर्न मंसिर ४ गते साधारण सभा आयोजना गर्ने भएको छ । कम्पनीले प्रस्तावित लाभांश साधारण सभाबाट पारित भएपछि कात्तिक २१ गतेसम्म कायम सेयरधनीलाई लाभांश वितरण गर्ने छ ।

किनभने बैंकले कात्तिक २६ गते एक दिन बुक क्लोज गर्ने जानकारी दिएको छ । सेयर बजार २२ गते बिहीबार बन्द हुने भएकाले यो बैंकको लाभांश प्राप्त गर्न चाहानेले कात्तिक २१ गतेसम्म नै सेयर खरिद गरिसक्नुपर्ने छ । 

यीलगायत बिन्ध्यबासिनी हाइड्रोपावरले प्रस्तावित आठ प्रतिशत बोनस सेयर पारित गर्न मंसिर ६ गते साधारण सभा बोलाएको छ । मन्दाकिनी हाइड्रोपावर ५.२६३ प्रतिशत र आशा लघुवित्त वित्तीय संस्थाले १५ प्रतिशत लाभांश पारित गर्न मंसिर ७ गते एकै दिन साधारण सभा आयोजना गरेका छन् ।

सगरमाथा जलविद्युत् कम्पनीले ५ प्रतिशत लाभांश पारित गर्न मंसिर १४ गते साधारण सभा बोलाएको छ । सोल्टी होटेलले ३६.८५ प्रतिशत लाभांश परित गर्न पुस ४ गते साधारण सभा बोलाएको छ । यस कम्पनीको लाभांश प्राप्त गर्न लगानीकर्ताले मंसिर १२ गतेसम्म सेयर खरिद गरिसक्नुपर्ने छ ।