काठमाडौं । नेपाली राष्ट्रिय महिला फुटबल टिमका मुख्य प्रशिक्षक राजेन्द्र तामाङले माल्दिभ्ससँगको जितलाई ठूलो मान्न नपर्ने बताएका छन् । 

नेपालले घरेलु मैदानमा जारी साफ महिला च्याम्पियनसिपमा सोमबार माल्दिभ्सविरुद्ध ११–० को फराकिलो जित निकालेको थियो । तर, प्रशिक्षक तामाङले माल्दिभ्सले साफका निम्ति पर्याप्त तयारी नगरेकाले यो जितलाई ठूलो मान्न नपर्ने बताए ।

“भुटानविरुद्ध मौका सिर्जना गरेर पनि त्यसको सदुपयोग गर्न सकिएन । आज ११ गोल भयो । खुसी छु । माल्दिभ्ससँगको यो गोललाई ठूलो मान्नुपर्दैन । किनकि, उहाँहरूले त्यति राम्रो तयारी पनि गर्नुभएको थिएन । महिला फुटबल खास चर्चित पनि छैन, माल्दिभ्समा । हाम्रा लागि महत्त्वपूर्ण सेमिफाइनल खेल हो,” प्रशिक्षक तामाङले भने, “म आज १–० ले जितेको भए पनि खुसी हुन्थ्येँ । आज हामीलाई जसरी भए पनि तीन अंक चाहिएको हो । मेरो लक्ष्य आजको खेलमा मात्र जित निकाल्नु होइन । अझै धेरै छ । पहिलो खेलमा भएका गल्ती आज केही हदसम्म कम भयो । त्यसले स्कोर फराकिलो भयो ।”

सोमबार दशरथ रंगशालामा करिब सात हजार नेपाली समर्थकमाझ घरेलु टिमलाई जित दिलाउन रेखा पौडेलले पाँच गोल गरिन् । यस्तै, प्रीति राईले ह्याट्रिक गर्दा सविता रानामगर, अनिता केसी र अमिषा कार्कीले समान एक गोल थपिन् ।

जितसँगै नेपाल समूह ‘बी’को शीर्ष स्थानमा समेत उक्लिएको छ । नेपालले दुई खेलबाट चार अंक जोडेको छ । समान खेल खेल्दा पनि अंकविहीन माल्दिभ्सको भने सेमिफाइनल सम्भावना समाप्त भएको छ । योसँगै माल्दिभ्स प्रतियोगिताको समूह चरणबाट बाहिरिने पहिलो टिम बनेको छ ।