काठमाडौं । ललितपुर महानगरपालिकाका मेयर चिरिबाबु महर्जनले बाढीको पूर्वसूचनापछि पनि लापरबाही गर्दा बढी क्षति भएको बताएका छन् । सोमबार ललितपुरमा आयोजित गत असोज ११ र १२ गते आएको बाढीका कारण नदी किनारमा थुप्रिएको फोहोरमैला सरसफाइसम्बन्धी तयारी बैठकमा उनले बाढीको पूर्वसूचना आएपछि लापरबाही गर्दा बढी क्षति भएको बताए ।

उनले असोज ११ र १२ गते आएको अविरल वर्षा र त्यसपछिको बाढीका कारण ललितपुरमा ठूलो जनधनको क्षति भएको बताए । उनले भूकम्पको सावधानी अपनाउने तर वर्षैपिच्छे आउने बाढीमा सावधानी नअपनाउँदा बढी क्षति बेहोर्नुपरेको उल्लेख गरे ।

"थोर बहुत नेपालको मेट्रोलोजिकल डिपार्टमेन्टले आउँदै छ है भनेर हामीलाई सावधान गरेको थियो । तर, हामी कोही पनि सिरियस भएनौँ । पहिला पनि भनेको थियो, भन्दै गर्छ नि भन्ने किसिमको भयो । तर, साँच्चै नै आउँदा महाभारत भयो । के गर्ने के गर्ने भयो," उनले भने ।

मेयर महर्जनले ०३८ सालको असोज १३ गतेपछि ललितपुरमा हालसम्मकै ठूलो बाढी आएको बताए ।

बाढीले थुपारेको फोहोर सरसफाइमा वडाहरूले चासो नदिएको भन्दै उनले सरसफाइमा जोड दिन आग्रह गरे ।